Monday, February 4, 2013

البنات الوحشين اللي بيشتموا !!!


الله يحرقهم بجاز وسخ ولاد الجزمة
ده كان تعليقي بعد ما اتفرجت على فيديو ياسمين البرماوي وهي بتحكي ازاى تم التحرش بيها ومحاولة اغتصابها فى التحرير وسحلها وضربها ورفعها على عربية لمدة سبعين دقيقة من الاهانة والوقاحة والسفالة
واللي يغيظ اكتر بقى لما تلاقى حيوان يقولك ماهى غلطانة اللى نزلها مظاهرات تستاهل
اولا انت مال امك هي راحت فين ولا جت منين هي حرة
ثانيا هو الدم والنخوة والاحساس انعدموا عند البُعدا اللي مش شايفين من بشاعة اللي حصل وفُجره غير ان البنت هي اللى غلطانة ؟ ده بدل ما يبقى قلبك مولع نار لان بنت حصل معاها ده ونفسك مثلا تولع فى اللى عمل فيها كده ؟؟؟  هي دي الرجولة ؟؟ اه نسيت معلش الكلمة دي انتوا ماتعرفوش عنها غير شكلها

التدوينة دي مش عن التحرش بس ان شاء الله هكتب تدوينة مخصوص عنه

التدوينة دي عن  البنات الوحشيين اللى لسانهم طويل وبشتموا ع الفيس بوك او مدوناتهم :)
ايون زي انا مثلا كده او اللي بيقولوا الفاظ عيب اوفر اكتر من الشتيمة العادية

فى العادى لما بلاقي راجل ع الفيس هو اللي بيشتم بمسحه انما لو بنت عادي ... لاء مش عنصرية او عنصرية عادي براحتي
المهم انها ظاهرة زادت فى الفترة الاخيرة انا للوهلة الاولى بتصدم لما بشوف ألفاظ أبيحة من بنت وبعدين برجع استوعب مدى الكبت اللى احنا بنعيشه والقهر اللى بيحاول المجتمع يفرضه علينا والاقي مبررات كافية انها تخرجنا عن شعورنا

المجتمع بيتفنن في ممارسة كافة انواع القهر والعداوة والغباوة تجاة الأنثي بصفة عامة

يعني مثلا كل الدعاوي اللى بتنادي بالحد من حرية المرأة بكافة اشكالها سواء بالتزام البيت او عدم تشجيعها  ع العمل او بالمبالغة في الحجاب بدعوة الخوف عليها اوقات واوقات تانيه الخوف ع الرجالة من الفتنة
هما غالبا بينادوا بده -اياً كان سببه ومبرره -لانهم مرضى ومشوهين نفسيا بيداروا امراضهم الذكورية بلسان الحكمة والنصح والدين

ولو خرجت يظهرلها بقي نفس النوع اللى فات بس من غير أقنعة الدين والحكمة دول بقى اللى بيقفوا يعاكسوا ويتحرشوا بيهم مش بيعرفوا يداروا عدائهم تجاه المرأة والنوعية دي ظهرت جدا الفترة الاخيرة ... الاكيد انها موجوده من زمان لكن يمكن النت ومواقع التواصل بدأت تفضح ده اكتر بس الاكيد ان مش كل بنت تم التحرش بيها بأى شكل هتكلم في ده

ده غير النماذج اللي بتعادي اي واحدة ناجحة لمجرد انها متفوقه عليه او مميزه عنه يالهووووووي دول بقى لا هما بينصحوا ولا بيتحرشوا دول بقى لسانهم طويل شويه بأسلوب او الفاظ تهين وتحرق الدم

ده غير طبعا الاسر والاهالي اللي طول الوقت بيفرقوا في المعاملة بين الولد والبنت والصلاحيات اللي الاولاد بيحصلوا عليها طول عمرهم مقابل ان البنات اكتر كلمه تتقالهم عيب انتي بنت
ماتعاليش صوتك انتي بنت
ماتشتميش عيب انتي بنت
عايزة تخرجي عيب انتي بنت ..ولو خرجتي طول الوقت تليفونات
وماتتأخريش عشان انتي بنت
ماتسافريش لوحدك انتي بنت
عيب يبقالك زمايل ولاد ف الجامعة عشان  انتي بنت
وعيب ولد زميلك يتصل بيكي فى البيت عشان انتي بنت

كبت كبت كبت من كل الجهات 
انا شايفة ان كل اللي فات اسباب منطقية للطفح اللغوي اللي وصلنا ليه

   لما بنت تسمع خطبة رنانة من اللي مش شايفين منها غير انها عورة وسبب فساد وضياع الامة والكلام الكبير ده وماتطولش تشده من دقنه مثلا وتسحله ع الارض وتفقعله عنيه اللي مش شايفه منها غير كده حقها تشتم

ولما بنت واحد حيوان يتحرش بيها ف مواصلة عامه ولا في زحمة وماتقدرش انها تفضحه في الشارع وتجره من قفاه ع القسم عشان محدش هيقف معاه ويكلموها انها كده بتفضح نفسها كأنها راحت معاه شقة مفروشه مثلا حقها تشتم

ولما بنت اهلها يفضلوا اخواتها الاولاد عليها فى كل حاجة وتبتدي تكره انها بنت وتقرر تسترجل عشان تقلدهم او عشان تطمن اهلها انها مش مطمع وتقدر تروح وتيجي براحتها حقها تشتم

ولما نشوف الهم اللي احنا عايشينه كل يوم والاخبار السودا والشباب اللي دمه بيروح هدر والبنات اللى بتتهان وسفالة الداخلية واحنا في مكاننا ومافيش في ايدنا حاجة تتعمل يبقى بدل ما نتجنن او نطق حقنا نشتم

انا اول مره شتمت فيها ع الفيس لما شفت صورة خالد سعيد كان قلبي محروق بجد وبعد وقت هديت ورجعت يومين الثورة لما شفت صورة المتظاهريين وهما بيصلوا والامن بيرش عليهم ميه وبقالي كتير مش بشتم بس النهاردة لما شفت صورة محمد الجندي وقريت تفاصيل تعذيبه كان لازم اشتم

الاخوان كمان وعمايلهم الزرقة كائنات محفزة لطولة اللسان بصراحة 

واخيرا انا عارفة ان الشتيمة مش حل بس يمكن تفريغ للغضب او الكبت او قلة الحيلة و مش لازم طبعا معنى اننا بنكتب شتيمه لما نقرا حاجة تستفز مشاعرنا ان  ده العادي في حياتنا الطبيعية 
===========
طبعا البوست ده ممكن يكون صدمة لسماح وسلوي :)  بس انا عارفه انهم هيسمحوني ومش هيمسحوني من قايمة اصحابهم ع الفيس هما بس احتمال يخلوني ما اكتبش هنا تاني وساعتها بقى هروح على مدونتي اشتم فيها براحتي 

15 comments:

رحــــيـل said...

اللي عايز يعلق ع الموضوع بالايجاب او بالسلب اوك
بس محدش يدخل يقولي عيب ومايصحش بليييييييييييز محدش يقولي عيب انتي بنت
:)
الله يرحمها جدتي ويديلكم طولة العمر

L.G. said...

مكدبش عليك انا شكيت مين اللي كتب البوست قلت مش معقول سارة الرقيقة الهادية وبعدين لقيت واحدة عمالة تزعق وتخبط في الحلل الله يكون في عون جوزك لما تتعصبي
انا فاكرة لما اتكلمنا في الموضوعده وقلتيلي من شدة غضب الناس حتى المحترمين بيخرجوا عن هدوؤهم ويشتموا بس في الاخر الغضب من الشيطان ولنا في رسول الله اسوة حسنة ويجب علينا الاقتداء به واننا نلزم حسن اللفظ والبعد عن الغضب لأنه بيعمي وفي الآخر ايه الاستفادة من الشتيمة ولا حاجة
حكاية باه المجتمع وعيب انت بنت ديه فقع الصراحة :) وحتى في الدين ربنا قال غض البصر للراجل والست والرجل يغض حتى عن المتبرجة والفاسقة وطبعا مفيش اي مبرر للتحرش بس انا عن نفسي ممكن منزلش التظاهرات مخصوص بسبب كده لأنه أذي نفسي دائم المفعول عافانا الله منه وحفظ بنات المسلمين
من ناحية انه صدمة :) اه اتصدمت الصراحة لكن ده لا يستدعي اي اجراءات تعسفية تجاهك خدي راحتك واشتمي براحتك مادام من غير كلام ابيح :)
بس ايه العودة المجيدة ديه ياسارة صحيح الجواز بيغير :)

L.G. said...

نسيت اقولك خليك بس راكبة معانا حنزلك في راس البر :)تهدي اعصابك ونشرب شاي ونبقى نطلع السما سوا بأه

رحــــيـل said...

:) بتهدي النفوس انتي يا سماح
عامة اى حد بيشوفنة متعصبة اول مره بيتصدم بعد كده بيتعود
المهم
بالنسبة لموضوع الشتيمة انا قولت عارفه انه مافيش فايدة منه بس يعنى مثلا لما تقري خبر عن تعذيب شاب زي محمد الجندي ممكن تحسي بايه ؟
يمكن رد الفعل بيختلف من شخص للتاني بس انا دماغي بتسخن فى ثانية وعصبية بطبعي

موضوع التحرش ممكن يحصل فى اى مكان
يعنى انا مثلا من عشر سنين كنت راكبه تاكسي فى المنصوره كنت راكبة قدام وكان السواق راجل كبير وفجأة لاقيت ايديه بتقرب قومت فاتحة باب التاكسي على مصراعيه والطريق كان رايح جاي فخاف طبعا على الباب وقف ينزلني ونزلت من غير ما اشتمه فى وسط الشارع
بصوت عالي

رد الفعل لو ماكنش على مستوى الفعل فى لحظته بيضايق جدا
معلش ع الصدمة
بس من اللى الواحد بيشوفه المهم ان مافيش اى قرارات تعسفية

رحــــيـل said...

ايون الواحد نفسه فى حته طرواة يركن فيها شويه ومش هلاقي صحبة احسن من كده :)

محمد said...

أستاذة رحيل
السلام عليكم
طبعا في البداية عود محمود إن شاء الله
...
من حيث المبدأ الله الرحيم بنا يعلم دخائل نفوسنا ومقدرتها علي تحمل ما يمكن أن يحدث ولذلك قال "لا يحب الله الجهر بالسوء من القول إلا من ظلم وكان الله سميعا عليما" ثم جاء بعدها مباشرة قوله سبحانه " إن تبدوا خيرا أو تخفوه أو تعفو عن سوء فإن الله كان عليما قديرا" ...."الآيتين من سورة المائدة 148-149

أما بالنسبة لسوء معاملة البنت في مجتمعنا للأسف فده ناشئ عن سوء فهم وقلة حيلة ولك يكن الدين أبدا سببا في كبت حريتها وتهميشها بل العكس فحينما كانت الزوجة تحرق حية في الهند مع زوجها الميت وتنبذ من يفلتن من الحرق فلا زواج بهن بل يبقين ملعونات تطاردهن اللعنات ... وعندما تصبح المرأة منبوذة نجسة يتحاشاها الجميع فلا يأكلون معها ولا يجالسونها عند اليهود وما ذلك إلا بسبب حيضها ... وعندما يذكر عند النصاري أنها أصل الخطيئة وأنها التي أغوت آدم وأخرجتنا من الجنة ...
يأتي القرآن كلام الله ليخلد ويعلي من مكانة الزوجة "إمرأة فرعون" ويعلي من مكانة الأم "أم موسي" ويبين أهمية الفتاة "مريم" ويظهر دور الأخت "أخت موسي" .... أختي الفاضلة لقد وردنا في حديث الرسول الكريم أنه كان في مهنة أهلة يخصف نعله ويخيط ثوبة ويمزح مع زوجاته ويدلل أطفاله وقد قال أيضا خيركم من بشر بأنثي في وقت قال الله عن المجتمع القائم "وإذا بشر بالأنثي ظل وجهه مسودا وهو كظيم " ... أعلم يقينا أنك لا تقصدين عكس ذلك ... ولكن أخاف ان يؤخذ الدين القويم بفعل شرذمة لا تمثله ...
ولذا فلنعمل جاهدين علي ايضاح أمر ديننا في رقي أفعالنا وتهذيب نفوسنا وذلك تطبيقا قبل أن يكون تحديثا ...
أما لما يحدث في هذه الأوقات فأرجو الله أن يعبر بنا إلي طريق السلامة والأمان ولن يحدث ذلك حتي نغير من نفوسنا فتصبح أعمالنا مطابقة لأقوالنا

...
عذرا لأني أكثرت من الحديث وشكرا لسعة صدرك
تحياتي

إنسان said...

حسبنا الله ونعم الوكيل

SHARKawi said...

اقتباس ( الله يحرقهم بجاز وسخ ) دا لازم يكون تعليق اي حد . مش بس انتي ياسارة . وفي الحقيقة انتي لان كلامك صحيح تماما فما حدش هيقدر يقولك حاجة . وكمان دي وجهة نظرك . ورؤيتك للموضوع . الا انه محتاج نقاش وكلام كتير . ربما اختلفت الاراء حول نقطة شتيمة البنات . لكن بالطبع ما حدش هيختلف على موضوع الكبت والخنقة وان اي حد بيمر بوقت بيكون عايز يصرخ بصوت عالي . ويكسر ويحرق ويدمر . مش بس يشتم . كلنا بنمر بالوقت دا . اللي بنلعن فيه الصغير والكبير .والحاجات والمحتاجات . الجماد والنبات . اقتباس ( المجتمع بيتفنن في ممارسة كافة انواع القهر والعداوة والغباوة تجاة الانثى بصفة عامة ) دا حقيقي طبعا . ودا محتاج مجرد ثقافة . تغيير تفكير . تغيير الرؤية لتلك الانثى . دا ببساطة محتاجنا نسمع كلام ربنا . ونرجع لاسلامنا ونعرف يعني اية انثى . ومين هيا الانثى . انها نص المجتمع وهيا اللي بتربي النص التاني . هيا الام وهيا الاخت وهيا البنت . والكلام عن الانثى ومكانتها امر مفروغ منه .

وزي ما الدين واسلامك هوا اللي قال قد اية مكانتك كبير . كان لازم برضة الاسلام هوا اللي يبقى الحد الفاصل في موضوع شتيمة البنت .
وازاي ان البنت بتخرج من وقارها ومن رقتها ومن جمالها وانوثتها لما بتتخلى عن مبادئها .

طبعا الموضوع زي ما قلت محتاج كلام كتير .ومش موضوع لأ مواضيع .

لكي مني تحياتي . تشكراتي . لكي مني كامل احترامي وتقديري .

مجلة الأم الصغيرة said...

بصراحة يا سارةو ماتزعليش مني البوست قفلني من أول سطر و مقدرتش أكمل
احنا ممكن نعبر عن الاستياء و الرفض اللي جوانا بس بكلام أفضل من كده كتير ومايكونش ليه وقع سلبي على اللي بيقراه

و على فكرة برضو ده مايمنعش إني بحب أقرالك أوي وبتابعك كل فين و فين و عشان كده حبيت أعلق على النقطة دي لإني بتمنى دايما أشوفك في مستويات أعلى في الكتابة و الأسلوب كما عهدتك

موفقة إن شاء الله و سلميلي على جوجو كتيير

Anonymous said...

الناس بتاعة بلاش كلام قبيح واحنا بنتخض دي عالم ملزقة وخنقة

وغالبا اللي بيركز في حاجة اوي كده - زي اللي بيقول انه مبيحبش الشتيمة او المشاهد الجنسية والعك ده بيبقى مركز فيها زيادة عن اللزوم بس لازم يبين انه محترم

لو حاجة مش عجباك سيبها تعدي ومش هتيجي ناحيتك وبطل تنصح الناس بتعالي


وشكرا على التدوينة

ظلالي البيضاء said...

حتى نبقى على ثقتنا بأن الدنيا لا تخلو ..
فهذه كلمات كتبتها من دمشق عندما رأيت فيديو البنت اللي سحلوها في التحرير وطبعاً لم أتابع الخبر أو أتعرف إلى اسمها وكان ذلك في نهاية سنة 2011 ..
كلماتي أو جزء منها :

دماء الشهيد تغلي في عروقي ..
وفي قلبي تثور سيــول الغضب ..

روحي دمائي فداك يا بلادي ..
ونُصرتُك على الثــــوار وجب ..

أنا إن خذلتك لن تُرفع لي هامةٌ ..
وحُزْتُ بذلك خِذلاناً من الرب ..

لئنْ ضَممتُ أرضَـكِ إلى فؤادي ..
لا لم أجاوزْ بذلك حدودَ الأدب ..

**********


تلك التي كشفوا عرضَهـا أختي ..
ومن قتلوها في المدارسِ ابنتي ..

أمي التي وقفتْ بوجْهِ الظالمين بروحها ..
ومَن صَرختْ "وامعتصماه" جدتـي ..

مهما شدوتُ بين القبـور بعزةٍ ..
ما من ضميرٍ بين القبور يسمعُ صَرختي ..


جارُوا على القرآنِ والإسلامِ فهل مِن ..
منادٍ بلسانِ الأنبياء "أمتي أمتي" ..


**********
كل التحية والمودة ..
أبو أسامة

شمس النهار said...

ايه ده انا جيت هنا وعلقت علي التدوينه دي؟؟
التعليق راااااااااح فين:)

L.G. said...

شمس النهار
طب ارجعي اكتبيلنا قلت ايه لأنه موصلش لحد فينا ويهمنا نعرف رايك
سماح

رحاب صالح said...

انا بالغالب لا بحب ده ولا ده
عندي الاتنين واحدولد زي بنت
الشتيمة ممنووووووووووووووع
ةوالحدود عندي للبنت والولد

Anonymous said...

انتى بنت بس بمائة رجل
سلام