بنات ؟ هم فين

من أول ما سلوى اقترحت حكاية مدونة البنات دي سألت نفسي بنات ؟؟ هم فين البنات أكيد في الحضانة بس وابتدائي على أقصى تقدير لحد الجامعة واستوووب

بعد كده دول عجائز مش بنات حتى شعرنا بيبيض من العشرينات

بجد أود أن أتنحى أو سلوى تغيرها لكلام عجائز ساعتها حكتب كل يوم

معنديش حاجة أاقولها بجد وهم فين البنات أغلب من أعرفهم أصحاب وعائلة كل الناس متجوزة مفيش بنات اللهم الا أحفاد أحفاد العائلة لو اعتبرناهم بنات كلامي معاهم هوا

ختي ايه في المدرسة يا حبيبتي ؟ اديني ماما بسرعة عشان كارت التليفون حيخلص

ما علينا

آخر مرة كنت ماشية على البحر مع صديقة لي هي طبعا أم وكنا في حالة توقف عن الصداقة حتى وصل أولادها لسن الحضانة عشان نعرف نمشي زي البني أدمين

مشينا على البحر وشفت خير اللهم اجعله خير

البنات حزينة قوي لدرجة ان حتى لو بنت لوحدها قاعدة على البحر تشكيله همها البنات فاض بيها والوحدة قاتلاهم وطبعا غلابة زيي آخرهم يقعدوا على البحر

قلت لصديقتي تعالي نبل رجلينا في البحر قالتلي ازاي والرملة قلت لها بس تعالي وبالفعل قلعت الكوتشي والشراب مع اني خنشورة وبليت رجليا في البحر وخير اللهم اجعله خير

لقيت أمة لا اله الا الله من البنات هوا ما صدقوا شافوني وهب كله حط رجله في المياه والولاد على السور بيتفرجوا قلتلها شفت البنات ومشينا

مرة صديقة أخري بعد صلاة العيد عملت كده وأختها بلت رجلها معايا ومن رآنا فعل بالمثل من البنات طبعا صديقتي يومها حذرتني وقالتلي من سن سنة سيئة

لا اله الا الله

وطب والاكتئاب يا ناس أعمل فيه ايه ياترى فعلا ده ذنب أبل رجلي في البحر والبنات دول آخد ذنبهم كمان ده حتى الشواطئ بفلوس الشواطئ المعفنة طبعا بس في الشتا والحمد لله على العاصفة الأخيرة من يومها مشي الراجل بتاع التذاكر وبقيت بروح أبل رجلي ببلاش حد قدي يعني

لي صديقة من القاهرة بتقولي مش لاقيه عريس ازاي مش بتمشي على البحر .. عجبا هما العرسان بييجوا من البحر لا شكرا وضحكت وقلت هل وجدت زوجك على النيل ؟؟

طبعا حدث ولا حرج عن البنات على البحر مع الأولاد ولا مشهد من مشاهد الأفلام ..فاهميني طبعا

أساسي عندي أجيب زلط وأحدف اللي قاعدين بين الصخور ومرة من غيظي لأنه في وضح النهار قمت مزعقة في الولد والبنت وقلتلهم اتقوا الله .. طبعا ضحكوا عليا وصاحبتي كانت خايفة يردوا عليا

دلوقتي أحيانا بكتفي بالزغر الشديد

كلمة حق دايما الولاد بيتكسفوا والبنت منتهى البجاحة

مرة واحد صياد سمعني مستاءة وأنا أتحدث مع صديقتي قالي متزعليش وراح نزل وقف جنب الولد والبنت وشاورلي انه حيقرفهم

مرة واحد معصعص شال واحدة قد الفيل قدامي أنا وصاحبتي ولف بيها قال ايه بيحبها .. طبعا بيستعرض ورقص وكانه فريد أستير _ مش اسمه كده؟

المهم على البحر طوف وشوف واتفرج

أما عني

البحر مدي بصري ممتد كامتداد أحزاني ..عميق كعمقها.. متقلب ..كلما سكبت فيه دموعي ابتلعها ولم يخبر عنها أحد

البنات

الله يكون في عون البنات

هم فين البنات

والله مرة شفت بنت عمالة تعيط وصاحبتها بتطبطب عليها كتبتلها الدعاء ده واديتهولها زي ما صاحبتي ادتهولي مرة

اللهم يا ملين الحديد يا مسهل كل شديد يا من هو كل يوم في أمر جديد أخرجني من حلق الضيق الى أوسع الطريق بك أدفع ما لا أطيق ولا حول ولا قوة إلا بالله العلي العظيم

امضاء

بنت عجوز