Tuesday, June 23, 2009

حيرة




وبعيدا عن افلام الخيال العلمي اللى بكلم فيها بقالي فترة وبعيدا عن احلام اليقظة اللى بنفوق منها على كوابيس الواقع نرجع شوية للواقع بس من غير كوابيس كفاية الكوابيس الليلية ونرجع للى المفروض انه يحصل رغم انى بكره كل ماهو مفروض وتقليدي
وبحبة منطق وبشوية عقل بس طبعا مش عقلي لان اساسا انا الحبة اللى كانو فاضلين عندى طاروا من زمان
هحاول افكر بشكل مختلف رغم يقيني اني مش هوصل للي يرضينى لكن وماله لعل وعسى ويمكن وجايز وميضرش برضه رغم انى عارفه اخر الحدوتة

من اول مبدأت اكتب هنا مع سلوى وإل جى وانا بفكر اتكلم عن جواز الصالونات ومن غير هجوم ولا انفعال ومعارضة حبيت اطرح الموضوع من خلال تساؤل هنوصله فى الاخر

لاقتنى بقولها فى حوار ساخن حائر ملوش مينا
هو احنا لما نحب حد نحبه عشان مفروض علينا نحبه ولا اصلا الحب هو اللى بيفرض نفسه علينا ؟
ردت وقالت بنحب الشخص لصفات جميلة فيه حنيته وطيبته حبه لينا
قولتلها ممكن منحبوش ولا نكره بس يكون عادي
قالتلى المهم الاستعداد للحب وللتغير والاستقرار من جوانا
قولتلها لازم يكون فى حب عشان يحصل التغير
قالتلى الحب بيجي بعد كده؟
طيب لو الحب مجاش بعد كده وفضل الاحساس انه عادي؟؟؟؟
سكتت شويه وقالت يبقى منكملش

وافتكرت حوار تانى كان بينى وبين واحده صاحبتي كنت بزورها لاقيتها جايبة ورقه وقلم وعامله حاجة اسمها تحليل سوت هو عبارة عن تحليل بيتعمل لما تكون قدام قرار ومحتار فيه بنكتب فيه نقاط القوة والضعف والفرص والمهددات كتبت هى طبعا المميزات اللى شافتها فى العريس اللى كان متقدم ليها والعيوب والظروف الخارجية اللى ممكن تهدد حياتهم او ممكن تكون فرصة ليهم وبتقارن وعمالة بتشرحلى وانا عندى زهووول مسكت الورقه وقولتها يابنتى اى حاجه تتحسب بالورقة والقلم الا الجوااااااااااااااااااز كونك توافقى او ترفضى ده راجع لانطباعك الشخصى و مشاعرك ناحيته مش ماسكه ورقه وقلم وبتحسبيها

طبعا هى لو كانت بتحبه عمرها ما كانت هتفكر كده لان اصلا هيكون فى استعداد انها تضحي وانها تتغاضى عن اى عيوب وتعرف كويس تتعايش معاها وهتكون على اتم استعداد انها تواجه اى تحديات معاه وده بيكون عيب فى جواز الصالونات ان اصلا بيكون الحد ده مش مهم قوي وبالتالي لما يحصل اى موقف حتى لو صغير مش بينفع نفوته لان اصلا مفيش دافع للاستمرار

حاسه انه بيكون فى فجوة بين الطرفين فى حالة انه جواز تقليدي لان محدش فيهم عرف التاني فى موقف وحياه قد ماعرفوا من كلام متزوق عشان الموقف اللى جمعهم
مش تعارف طبيعى وتلقائى يكون كل حد فيهم على راحته ومن غير ما المفروض انهم يحبوا بعض وان يكون ده شغلهم الشاغل وتكون المواقف مفتعلة لتحسين العلاقات او لانهم يقنعوا بعض انهم بيحبوا بعض

يعنى الصح ان الحب يتولد لوحده جوانا من غير منحس بيه يتسرسب فى روحنا فجأة نلاقى نفسنا حبينا
ولا نعيش نفسنا وهم الحب ونقنع نفسنا بيه واحنا اللى نخلقه بينا هيكون زى الطفل اليتيم اللى قررنا ان احنا نتبناه وبنحاول دايما انه ميحسش بغربة بينا وانه مننا ونيجى فى يوم غصب عننا نفتكر انه مش ابننا هنجرح نفسنا ونجرحه بس هيكون فات الوقت وكان م البداية الصح ان احنا نسيبه لحد ما يتولد لينا ابن من روحنا ساعتها لانه هيكون وليدنا مش هيهون علينا نجرحه فى يوم ولا نجرح نفسنا ؟؟؟

مش عارفة بجد بس عارفة انها بتختلف من شخصية للتانية ممكن ناس يناسبها جدا الزواج التقليدى وتنجح فيه وناس تانيه بيكون صعب عليها التكيف مع اى حد نفسيااات بقى نعمل ايه ههههههههه لالالالالا مش انا طبعا ده انا عاقلة جدا خالص اخر حاجة
------------------------------------------------------------------
هسافر تلات ايام كده اشوفكم لما ارجع ان شاء الله
ههههه باين كده والله اعلم انا خدت المدونة لحسابى ومن هنا ومن مكاني بنادى بعلو صوتي على سلوى وال جي المره جاية مستنية حد غيرى يكتب انتو لو سيبتونى كده الناس هتطفش م المدونة مانتو عارفين اللى فيها حد عاقل يكتب بقى كفاية جنان ع الناس

13 comments:

سلوى said...

بصي يا لولو
الكلام في الموضوع ده والحسابات
ماينفعش خاااااااالص

ليه؟
أقولك
إحنا ممكن نحسب ونرتب ونفكر
وحب ولا مش حب
تقليدي ولا رومانسي

وفي الآخر
كل الحسابات تقف أمام النصيب
والقسمه

الإنسان اللي كل واحد هيرتبط به مكتوب عليه من يوم مااتولد
يبقى نكبر بقى
ومش نفكر كتير
ونخليها على الله

ممكن إنسان يعيش قصه رومانسيه جميله
وتنتهي بألم
وممكن إتنين عاديين جدا وما شافوش بعض غير لما صدفه و يتجوزوا
ويعيشوا في منتهى السعاده

مافي شئ مضمون
كل واحد بس يصغي نيته
ويتقى الله
وهيلاقي اللي ربنا كاتبه له
من غير حسابات
ولا عيوب ومميزات
فكلنا عيوب عزيزتي
:))

مجرد رأي يا لولو
ربنا يرزقك الزوج الصالح
ويكون بينكم السكن والود والرحمه
ده في إعتقادي أجمل وأشمل شئ :)
ويرزق البنات كلها وكل الرجاله برضه
:))

اللهم آمين
إدعولي انتوا بقى :)

Rehab Mostafa said...

مش هتصدقي لو قولتلك اني فكرت النهارده في موضوع الحب اللي بيفرض نفسه
بصي في حاجات كتير في الموضوع ده
لو جواز تقليدي يبقى أنا مجبره اني أحب الشخص ده في فترة الخطوبه وفكرت بالنسبه ليا في الموضوع ده لاقتني مش هعرف ...أصلاً فكرة ان حد مايعرفنيش ولا أنأ أعرفه جاي متقدم علشان جوازه والسلام مرفووووووضه بالنسبه ليا وبيكون أنا وهو لازم نحب بعض ونتكيف على عيوب بعض بس هل الحب ده إلزام؟؟؟؟ مافتكرش يعني
في بقى حد ممكن يجبرك انك تحبيه لما يطاردك بحبه وده اللي كنت بفكر فيه النهارده لو الشخص ده مش في دماغك خااااااااالص ولاقيتيه بعد كده بيصارحك ويطاردك مش هتلاقي غيره قدامك وممكن تكوني مضطره تحبيه (رغم اني بعتبرها رخامه منه) وعلى حسب الشخصيه برضه
وفي الحب الصامت اللي كل واحد من الطرفين بيحب التاني لكن ماحدش بينطق فيهم
والحب اللي من طرف واحد وهكذا :D
باين والله اعلم بعدت عن الموضوع
بصي عمل مقارنه دي ممكن تتعمل في قرار تاني غير الجواز الا اذا كانت البنت دي عمليه جداً ولاغيه قلبها وبتفكر 100% بعقلها يعني
وعلى فكره اللي بيحب بجد مش بيشوف عيوب والمعنى الحقيقي مش انه مش بيشوف العيوب لأ بيشوفها بس علشان بيحب اللي قدامه بيتكيف مع العيوب دي وبيحب اللي قدامه على عيبه (طبعاً في عيوب ماتنفعش نسكت عليها)
والحب حاجه كده بتتولد لوحدها ممكن تكبر مع الوقت وممكن تموت حتى لو اتفرضت علينا وفي حاجات معاها زي العشره اللي ساعات بتكون أقوى من الحب
أنا حاسه اني رغيت كتير وخرجت عن الموضوع
بس بجد بجد بجد أنا معاكي في كل كلمه بصراحه وكويس انك مزلتي من الخيال العلمي ومرحباً في أرض الواقع :)ا

حنان سعيد said...

رحيل حبيبتي

اولا انتي واحشاني كتير

تاني حاجه موضوعك مهم كتير
يمكن انا مش قادره اقول انتي متفقه معاكي بنسبه 100%
بصي يا قمر

هو انا مش مع ولا ضد الزواج التقليدي

وانا عن نفسي مش مخطوبه عن طريق التقليدي

المهم بقى

عارفه نفس عيوب الزواج التقليدي تقدري تقولي هي هي نفس مميزاته
عارفه ليه

لان كتير اووووي بيبقى الحب بيشد الواحد من غير ما يفكر ولا اي حاجه
عندك حق لو صحبتك كانت بتحب ماكنتش هتحسبها بالورقه و الالم
ويمكن لاننا بنحب ممكن نكمل في حجات صعبه تكمل
وكان الحب لوحده هيعيشنا
لازم لاحترام والتفاهم
عارفه الي اهم من الحب الاحترام
وده اكيد يبقى متوفر جدا في الزواج التقليدي لان مجرد انها هتحترمه فهتقرر ترتبط بيه

عارفه كمان
ان في الحب شويه كتير اووووي الحبيب بيفترض المثاليه في حبيبه
وانهم هيعيشو ديما في حب ورومانسيه وحياه رقيقه ووووو
وده كل طبعا بيبقى مخالف تماما للواقع بعد الزواج
فتلاقي خلافات بسبب كده كتير اووووي
بس الزواج التقليدي بالعكس
مش هتلاقي النجراف في المشاعر ده اوووي
فهيقررو الاتتنين يعيشو الحياه مع بعض
وهيجي الاحترام
وحب العشره


صديقني الحب ده مش حب يتيم
بالعكس ده حب قوي
واقف على ارض صلبه
مش حب مشاعر فياضه وبس بتهدى بعد فتره
وبروضو هيفضل في الجواز عن حب حب العشره وبس


بصي يارحيل هي القضيه متشابكه جدااا
بس الي اقدر اقوله ان الاتينين مافهمش اي حاجه تنقصه

ولكل واحد مميزاته وعيوبه


ويمكن اكون انا شايفه ان الحب طبعا لو كان ناضج ومتفهم للفرق بين الحب قبل الزواج وبعده
وكان حب صح من غير مرايات عاميه
يعني حب بنضج اكيد طبعا انا شيفاه احسن وده الي انا الحمد لله ربنا وفقني ليه

مع اني عارفه وبلاحظ حولي كتير ان الي بيحبو بعض بيكونو متخيلين المثاليه
وده غلط


انا طولت اووووي عليكي
ماعلش

Towtor said...

السلام عليكم
حبيت المدونة بتاعتكم اوى
وعجبنى اوى البوست اللى فات .
انا شايفة ان الموضوع ابسط من كده ..روح غريبة بتتسلل لينا بتخلينا منجذبين للطرف التانى ..بتكون بردوه موجودة لو جواز صالونات ..زى ماقلتى ..اقل قدر من التفاهم ..وبس بعديها يبدأوا يتعلقوا ببعض ..حتى لو ده اتأخر شوية ..المهم ماتكونش فيه حاجة حتى صغيرة تحسسنا بالنفور ..لانها لو موجودة هيبقى صعب نحس بأى انجذاب..البنت عندها طاقة حب كبيرة ..حتى لو ماتعرفش الشخص ..هتحتويه وتفهمه .
محدش بيتغير ..يمكن بنعمل اللى نفسنا نعمله ومكانش فيه فرصه ..يمكن مستنين الوقت المناسب .
فى جواز الصالونات كل طرف بيظهر الحاجات اللى بيحبها فى نفسه ..مش بيمثل ..لكن بيحاول يبقى هادى ..متفائل ..بعيد عن اى ضغوط او مشاحنات ... بس الخوف ان يكون ده حلم وبعد الجواز يكون شخصية عصبية ...بتحب الامتلاك والسيطرة او تحسس الطرف الاخر دايما انه مقسر ناحية الطرف التانى وده صعب جدا ..اوقات بحس انه كابوس ..اهم شيء العشرة بالمعروف وان كل طرف يتقى الله ويعرف انه رباط مقدس .
تحياتى لكم
Meshmesha

thunder said...

نوكومنت لان دا اصعب موضوع نتكلم فيه وفى نقاط كتيرة اوووووى
وفعلا اكتر موضوع الاقى محدش متفق فيه على اقل وجهة نظر لكن ربنا يرزقك كل خير ياارب
دمتِ بكل حب و ود وفى رعاية وحفظ الله دائما يارب

Anonymous said...

اختى رحيل
سلام عليكم الاول
بصى انا عاوز اقولك وبصراحه ان للاسف كل البنات اصبحت بتحسبها بالورقة والقلم
وقليل جدا جدا اننا نلاقى بنت بتفكر بقلبها ومش بتحسبها

انا نفسى كنت على علاقة ببنت
حبيتها حب محبهوش ولد لبنت ولا راجل لواحدة
بجد كنت بحبها بجنون
وهى كمان كانت مبينالى كده
وفجئه
لقيتها بتسيبنى وبتقولى يا حمدى الفقر مش بيصنع السعادة
قالتها وهى بتبكى
وقفلت السكة
مع انى والله الحمد لله مش فقير ولا حاجه
بس الموضوع اللى عرفته بعد كده انها عرفت ولد ابوه غنى شوية
بالزمة دى تبقى انسانة ولا ايه بس
المهم ان الحب الحقيقى اللى حضرتك بتسألى عليه
اصبح نااااااااااااادر جدااااااااا
سلام عليكم

dr.gesho said...

مش المهم جواز صالونات واللا جواز تانى المهم اننا منضحكش على نفسنا ونقول اهى جوازه لقطه و خلاص
ساعات كتير بيكون جواز الصالونات ناجح جدا والحب بين الزوجين بيكون صادق جدا و قوى جدا
المهم نتاكد من مشاعرنا
صادقه واللا لا
مش يمكن ربنا كاتبلهم انهم يتقابلوا كده و يحبوا بعض كده زى ما كتب لناس تانيه انهم يتقابلوا فى الشغل مثلا او فى الجامعه
انما ورقه وقلم لا
مشاعر صادقه اه
و صدقونى اول ما تقابلوه هتحسوا بيه وتعرفوه
اللى هوا الحب يعنى
تحياتى

محاولة لكسر الصمت said...

...يبدو أن هذا السؤال يحير الجميع..
مثلك ربما أرى في الحب عاملا أقوى, ولكنني لا أرى أن الحب الذي يولد في ما نصفه (بجواز الصالونات) حبا ناقصا أو مبتورا...
لا لشيئ سوى أنه ليس هناك حب ناقص...الحب هو الحب لا يحتمل الوصف أو النقصان...لكن المشكلة الحقيقة, هل هذا الحب صائب أم لا؟..
تحياتي..

hasona said...

السلام عليكم

كل أمورنا غلفت بالحيرة

ولأن الحب قناعات
فتختلف قلوبنا عنه وقولنا فيه

،،،
لكن الزواج له قوانينه
وفيه جوازات صالونات أو تقليدية نجحت وأثمرت

وهناك زيجات عن حب فشلت ونضبت

اذا ترجع الي الشخصية والي قناعاتها
ومدي العطاء وما تحمله من صفات جميلة أو سيئة

L.G. said...

شوفي يا بنية
لو حبينا الاول واتجوزنا بعد الحب يبقى خير وبركة

ولو اتجوزنا الاول وحبينا اللي اتجوزناه بعد كده يبقى خيط وبكرة

ولو ما حبينا في الاول واتجوزنا وما حبينا في الاخر
يبقى يا فرحة ما تمت

بس خلاص
الحب رزق ونصيب يجي الاول يجي بعد الجواز ميجيش خالص ده رزق من الرزاق متشغليش بالك

على فكرة مقرتيش الموضوع كله بس ضحكت على اننا انا وسلوى عجزنا وبطلنا نتكلم زي البنات :)))

مجتيش اسكندرية ليه يا ستو هانم:(

عمادخلاف said...

ينفع كدة اول ما افتح المدونة الاقى حبل المشنقة المهم خفت ورجعت
على العموم انا عماد خلاف
http://emadkhalaff.blogspot.com/
وفى مدونة اسمها بحلم ببكرة
ياريت يكون فى تواصل

Anonymous said...

بصى ياساره

انا بصراحه مع الجواز التقليدى ومؤمنه جدا
انه ممكن يكون انجح فى احيان كتير من الجواز المبنى عن حب لاسباب احب اوضحها
اولا
احنا لما نحب
خاصه البنات
بنغمض عنينا عن سلبيات كتير ممكن تكون موجوده فى الشخص اللى قدامنا
وممكن فيما بعد تتسبب فى هدم حياتنا
لان الواقع بيقول ان مش كل الايام حب فى حب
لا دا الموضوع بيت وزوج واولاد
ومسؤليه بتكبر يوم عن يوم
اما الجواز التقليدى
فانتى بيتقدملك شخص فيه مواصفات كويسه بتقعدى معاه بتحاولى تشوفيه وتحللى شخصيته وتعرفى عنه اكتر وتحددى يناسبك او لا بعقلك اولا
بعدها لو كان شخص مناسب وحسيتى انكوا متفاهمين وممكن يكون فيه مشاعر بينكوا بتكملى
دا طبعا مش معناه انى ضد المشاعروالحب قبل الجواز بالعكس
انا ضد اى بنت تتجوز جوازه كويسه وخلاص من غير مشاعر
لازم يكون فيه مشاعر وطبعا دى بتتكون اثناء فتره الخطوبه والمعرفه بدرجه اكبر مع الوقت والاعجاب اللى ممكن يتحول لحب بعدين
لكن ان محسناش بدا يبقى الافضل نسيب قبل الجواز مهما كان العريس مناسب وسورى غصبن عن اى حد
لان دى حياتنا اللى مش هيعيشها غيرنا واختيارنا اللى مش هيتحمل نتيجته غيرنا
وبصراحه ان مؤمنه جدا ان التفاهم فى كتير من الاحيان بيخلق الحب
لكن مش كتير لما الحب يخلق التفاهم
لانه فى الغالب بيبقى تفاهم وقتى
نتيجه للمشاعر اللى بنحس بيها

يعنى بمعنى اوضح انا متعلقه بشخص جدا وحاسه بنحيته بعمله نادره اللى هى الحب فممكن دا يخلينى اغمض عنيا عن حاجات ممكن تتسبب فى هدم بيت بعدين

لكن الجواز التقليدى بيكون مبنى على التفاهم قبل المشاعر والعواطف
مبنى على العقل والاختيار بتفكير مش مبنى على العاطفه والانسياق وراها

علشان كدا كتير بنسمع ان فيه اتنين كانوا بيحبوا بعض جدا بعد مااتجوزوا اكتشفوا انهم مختلفين عن بعض
وانفصلوا

واتنين اتجوزوا عن تفاهم واعجاب واتولد بينهم الحب وكونوا اسره سعيده متفاهمه ومتماسكه

كمان السؤال اللى بيطرح نفسه

ياترى هنلاقى فين الحب

وازاى هنقدر نعرف ان كان حب بجد او مجرد اعجاب

بصراحه انا ضد اى علاقه ممكن تتكون من ورا الاهل
فهنحب امتى ازاى وفين

اجابتك على سؤالى ياساره هى اللى هتحدد تكمله ردى على سؤالك

شكرا ليكى

the moonlight

deema said...

في رأيي ان الحب ده بيجي لوحده من غير ما نحس بيه وكل لما نحاول ننساه بيكبر اكتر
ولما تتجوزي حد وانت مش حاباه انت كده بتجبري نفسك تحبيه وانت فعلا لازم تحبيه انا مش بشجع العلاقات اللي قبل الجواز بس على الاقل تبقى فيه فترة خطوبة كافيه عشان يجبو بعض ولو مقدروش يحبو بعض يبقى الانفصال احسن