الحب .. و أشياء أخرى

إمبارح منى أحاسيس قالت لي فين موضوع كلام البنات .. الموضوع حمض
ههههههههه
وإل جي كمان صبرت عليا الحقيقه
عارفه إني إتأخرت .. معلش .. سامحوني
عموما أنا جبت لكم مشروبات وساندوتشات كمان
علشان الجلسه يمكن تطول .. وبسرعه ندخل في الموضوع
أنا خرجت من التعليقات بحاجات جميله يالا نشوف
1 .. الحب .. كل إنسان ( رجل أو إمرأه ) يبحث عن الحب .. يبحث عن من يهتم به ويحنو عليه
كل إنسان يتمنى أن يحب وأن يجد الحب من الطرف الآخر ولكن مع عدم التنازل عن ماهيه الطرف الآخر
بمعنى
إن المرأه تريد الحب ومن يهتم بها و..و..ووو ...تريد ذلك من الرجل ولكن مع كونه رجل
والرجل طبعا زي ما قلنا الموضوع اللي فات مش شنبات وصوت عالي
الرجل المفروض إنه حد قوى ولأنه عارف إن الطرف التاني أضعف فبيكون رحيم ..
المرأه عايزة رجل تعتمد عليه سند وضهر زي ما قالوا في التعليقات
صاحب قرار .. ويعرف إمتى يشد وإمتى يرخي
إمتى يكون صارم وإمتى يكون رومانسي
والحاجات دي مش صعبه على الرجل على فكره
لأن ربنا أعلم بنفوس عباده وأكيد كل مؤهل لما خلق له
نيجي للرجل بقى أحسن يقولوا إني عنصريه نياهاها ( ضحكه شريره ) :)
الرجل كمان يريد الحب ومن تهتم به ..و.. و .. و ولكن يريد ذلك من المرأه مع كونها إمرأه
يريد أن يري أمه التي تسامح دائما وتعطي بلا حساب
أن تكون صديقه وزوجه ... حاجه كده زي فيلم إمرأه واحده لا تكفي
ده كمان مش صعب على فكره إن تقوم به المرأه
لأن زي ما قلنا أكيد ربنا خالقنا وعالم بنفوس البشر وكل مؤهل لما خلق له
كده وصلنا لمعادله فيها طرفين وفيها

مدخلات ومخرجات
ما ينفعش طرف هو اللي يعمل ويعطي ويقوم بكل الأدوار .. وطرف يأخذ ويأخذ
كده المعادله مهما طال تفاعلها لازم يجي يوم وتختل والطرفين هيخرجوا خسرانين
كل الكلام اللي قلته وقلناه ممكن يتلخص في ثلاث كلمات
وهم ( السكن والود والرحمه ) زي ما ربنا قال
لو كل واحد حاول يكون السكن للتاني .. وما أدراك ما السكن يعني كده تكون بحريتك وراحتك
حاسس بأمان وسكينه وطمأنينه ..
والود وما أدراك ما الود أعلى كتير من الحب
والرحمه .. يا سلام لما تعيش مع حد عنده رحمه .. حاسس بك لا يثقل عليك ومتفهمك ومحتويك
على فكره .. الود بيكون في السراء والرحمه بتكون في الضراء
الله لو كل واحد وجد في التاني السكن والود والرحمه
كل شئ هيبقى تمااااااام
طولت عليكم .. بس المفاجأه إني لسه مش خلصت هههههههه
اللي تعب يروح ع الثلاجه بس يجيب لي حاجه معاه :)
نيجي بقى لكلام العلماء النفسانيين
بيقولوا إن المرأه تحب عن طريق السمع .. أما الرجل فيحب عن طريق الرؤيا
مش عارفه هل الكلام ده حقيقي ولا في استثناءات
المهم
خدوا بالكم يا بنات بقى في شباب بياكلوا ودن البنات باسطوانات وكده
والبنت يا عيني تصدق .. وفي الآخر قلبها ينكسر
وبهذه المناسبه كتبت لكم الكلمات دي .. اللي عايز يحدف حاجه يحدفها بس بلاش الكراسي
دي عليها أقساط يا جماعه:)

خدي بالك .. :)
هيقول كلام كتير
هيقول إنك ستهم
خدي بالك
حب كتير
وإنت زيك زيهم
هيقول
إنك ملاك
وإنك غيرهم كلهم
وإن مكانك هناك
ملكه على عرشهم
خدي بالك
هيسمعك كتير
وعنيكي بحر كبير
بيغرق وسطهم
هيقول فيهم أمان
وهلاكه في بعدهم

خدي بالك
هيحلم ببيت كبير
وعيال يضمهم
هيقولك بس نفسه
إنك تبقى أمهم

يااااااااااه
هيقول إنك جنته
وإنه مش منهم
وفي قربك فرحته
ماهو في الكدب عمهم
خدي بالك

مممممممم خدي بالك بقى
وعلشان أكون منصفه ففي بنات برضه فظيعه
برضه شغلتها تتسلي بقلوب مخاليق ربنا
المهم عايزة أقول
إن كل طرف له إحتياجات المفروض الطرف التاني يأمنها له ويوفرها له
وبكده تبقى الحياه جميله
يعني يا ريت نحس ببعض ونفهم بعض وبلاش نخدع بعض أو نكون أنانيين في تعاملنا
بلاش نحسس الطرف التاني إننا إشتريناه فنعامله بقسوه
إرحموا من في الأرض يرحمكم من في السماء
حاجه كمان لاحظتها في التعليقات
إن البنات مفيش واحده قالت أنا عايزاه يكون عنده سياره النوع كذا
أو يكون شبه المطرب الفلاني
أو يكون رصيده أمامه أصفار كتير
أصل هتستفيد إيه لو عشت في فيلا فيها كل شئ وركبت عربيه أحدث موديل
وكان جوة قلبك غربه وحزن وألم
فعلا طولت عليكم يالا سلام بقى