Saturday, May 31, 2008

الرجل والمرأه .. كيف يرى كلا منهما الآخر؟؟؟




ملحوظه : ( إيه ده هو في موضوع بيبتدي بملحوظه ؟ :) ما علينا
هذه المدونه شركه تضامنيه متحده بينى (سلوى ) وبين العزيزه جدا

LG

ده أولا
ثانيا : هذه المدونه ليست حكرا عى البنات فقط
هي للجميع .. صحيح إحنا قلبناها قاعده بنانيتي
بس مفيش مشكله
المدونه واسعه وممكن نعمل قاعده ولاليدي ( إيه ولاليدي دي .. ما علينا) المهم المدونه للجميع

وإثباتا لذلك
موضوع اليوم عن الرجل والمرأه تحت الميكرسكوب
أنا بس هقول الفكرة وكلنا هنشارك فيه
يعني إيه ؟
الموضوع باختصار عن
الرجل والمرأه في أعين بعض

أي
كيف ترى المرأه الرجل النموزجي من وجهة نظرها؟؟
وكيف يرى الرجل المرأه النموزجيه من وجهة نظره ؟؟
طبعا كل واحد وله فكره ورأيه ومعتقده
وما أراه نموزجي قد يراه غيرى أقل من العادي

مثلا ده سؤال موجه للبنات من أحد الشباب
هل الفتاه التي خرجت للعمل وتعاملت مع أصناف مختلفه من البشر
ولديها مدونه
هل هذه الفتاه من الممكن أن توافق أن ترتبط بإنسان عادى جدا وبسيط
وحتى ليس عنده مدونه ؟؟؟


كمان في إشاعه بتقول إن الرجل يفضل الفتاه اللي مش بتشغل عقلها
ولا تعمل .. فهل هذا حقيقي؟؟


كمان ده سؤال من أحد المدونين

هى البنت اللي بتخرج وملبسها ومكياجها غير لائق تماما .. ليه بتعمل كده ؟؟


المهم يالا يا بنات اليوم جلسه نميمه ع الرجال
(دا إحنا هنم نم )
ولا بلاش أحسن هما كمان ينموا علينا
يالا الطيب أحسن
عارفين ؟
في مقوله زمان قوى سمعتها
كنت صغيرة قوى لكني لسه فاكراها بتقول

الرجل مش بالصوت العالي والشنبات
إمنعوا الضحك

ههههههههه


فعلا الرجوله معناها حاجات تانيه
مثلا ساعات بنقول على واحده إنها بمية راجل
مع إنها إمرأه
يالا مش هطول عليكم
عايزة كل واحده وكل واحد يقول
كيف يرى الآخر ؟؟؟
ملحوظه : بعد إذن
LG
نجعل الموضوع القادم لتلخيص ما سنتوصل له في التعليقات
وطبعا أنا زيكم بالضبط ستجدون رأيي في التعليقات
سلام بقى .. أروح بسرعه ألحق كرسي

39 comments:

ra7eel said...

انا كنت لسه هنا حالا يدوب مسافه السكه لمدونتى
الاقى الموضوع نازل
هههههههههههههههههههههههههه
اه يااااانى ياسلوى قلبتى المواجع
سؤال صعب جدا بجد الرجل النموذجى
ههههههههههههههههههه
شوفى ياستى عن نفسى
اتمنى رجلا طموحا مثقفا رجلا بكل ماتحمله معنى كلمه رجل من معان وصفات نفتقدها حقا فى تلك الاونه
وكمان يكون طيب وحنين
وذكى ويعرف بتعامل معايا
يعرف يحتوينى
يحترمنى جدا ويتعامل معايا على انى كيان مستقل بذاتى
ويحترم المرأه بصفة عامة
مهذب جنتل مان
عاقل جدا ومجنون زييى
عنده صبر وميكونش عصبى
اجتماعى ويكون انسان ناجح

ايه ده انا فين؟
ههههههههههههه انا عايزه واحد تفصيل وصلحواااااااااااااا
ههههههههههه
عندك عريس بقى؟
البوست ده هيكون جامد بجد
انا متابعه ان شاء الله باقى التعليقات

سلامى للجميع وتحياتى لكل الناس اللى هتدخل هنا من قبل مايجوا

Salwa said...

يا هلا يا هلا
إنتي قاعده على باب المدونه يا ست ساره
ههههههههههه

كده نبقى خالصين

بس إيه المواصفات دي
عموما في كلام البنات كل طلباتك موجوده يا فندم

في انتظار البقيه

سلام مؤقت

youma said...

الراجل
هو لي ثقتي بنفسو ملهاش حل

يعني لا مستواكي التعليمي ينقص من قيمتو فحاجة ولا مستواك الاجتماعي يجرحو فحاجة

يعني يحسسك بقيمتك وانك كل ما ارتفعتي درجة كل ما هو حس بعلو قدرك

الراجل لي بيكون راجل فحنيتو يعني قوي يحميك ويكون احن واحد عليكي

الراجل لي يحسسك بأمان

الراجل لي ميكدبش عشان يكسب ثقتك
لي ميستعطفكيش عشان يوصل لغرضو

لي ميستغلش طيبتك
لي يحس بيكي قبل الكل

الراجل لي يفكر بدالك
لي ميسبكيش محتاجة لحاجة وهو موجود

دا الراجل فنظري

Salwa said...

youma

أديني قاعده على باب المدونه
لما أشوف آخرتها معاكم

يوما شرفتي المدونه

هو لي ثقتي بنفسو ملهاش حل

الراجل لي بيكون راجل فحنيتو يعني قوي يحميك ويكون احن واحد عليكي


الراجل لي يحسسك بأمان

الراجل لي ميكدبش عشان يكسب ثقتك
لي ميستعطفكيش عشان يوصل لغرضو

لي ميستغلش طيبتك
لي يحس بيكي قبل الكل

الراجل لي يفكر بدالك
لي ميسبكيش محتاجة لحاجة وهو موجود

إيه الكلام الجميل ده

متفقه معاكي جدا
وهذود عليه بس لما آجي أقول رأيي

بس بجد طلباتك بسيطه وقويه

بس لا حظتوا حاجه

أولا لحد الوقت مفيش ولا راجل دخل المدونه


تاني حاجه
هقولها في نهايه البوست إن شاء الله

Anonymous said...

شوفى ياسوسو المواصفات وانا فى انتظار التفصيل


متدين بس مش متزمت ,طيب,حنين
اجتماعى _يحس بيا ويكون بطبعه محترم علشان يحترمنى ويحترم غيرى
واهم حاجه برضه يكون ذوق وبيعرف فى الاصول
يكون عنده ثقه بنفسه و يفكر بموضوعيه ويقدر ياخد قراراته بنفسه وفى نفس الوقت ميلغيش رأيي

يكون عنده رحمه وتواضع
يكون صبور بس متوصلش لدرجه انه يكبر دماغه يعنى _ركزو معايا
يغير بس مش الغيره اللى تسبب المشاكل واهم حاجه برضه انه يكون صريييييح معلش طلباتى كتير بس هعمل ايه فرصه

Anonymous said...

نسيت اقولك اهم حاجه
انا نجوى اختك

Salwa said...

ماشى يا نوجه

كله موجود إن شاء الله

بس والله طلباتك معقوله

وبعدين إنت أختى بقى

يعني أتوصى بك حبتين

دمتى في حفظ الله

Rehab Mostafa said...

والله موضوع حلو أوي
بصي يا ستي
أنا مش طماعه
الرجل المثالي في وجهة نظري::
1- متدين بس مش متزمت يعني عارف دينه وبيصلي ... علشان كمان يراعي ربنا فيا
2-محترم ورجل أوي بمعني الكلمه.. اللي هو بيغير على أهل بيته ... رجل في تصرفاته .. يدافع عني ويحترمني
3-يحس بيا من غير ما أتكلم
4- يفهمني ودي أهم حاجه بصراحه ويكون ذكي علشان مش بحب أتعامل مع الأغبيه :$
5-مثقف مش لازم عم العبقري أوي يعني بس يكون فاهم الدنيا
6-يكون ليه علاقه كويسه جداً بالكمبيوتر ياسلام عليه لو حاسبات ومعلومات زيي كده يبقى تمام والله على الأقل علشان يحس بأهمية الكمبيوتر ومايغرش عليه منه :$
7-صادق وصريح معايا جداً جداً جداً
8- يغير عليا بس مايشكش فيا... يعني يكون واثق فيا جداً جداً جــــــــداً
9-نسيت أقول يكون بيحبني :)) بس أكيد مدام فاهمني وحاسس بيا يبقى بيحبني
10- مش لازم يكون شكلاً أمور بقى وجامد المهم يكون مقبول بالنسبه ليا ومدام بحبه هيبقى في عيني أحسن راجل في الدنيا
11- من الحاجات المهمه برضه انه يكون طيب وحنين عليا
12- لازم يبقى فيه توافق فكري بيني وبينه
13-مايفرضش رأيه عليا ويديني فرصه للنقاش يا يقنعني يا أقنعه

مممممم كفايه كده .... الكلام مش بفلوس :))

كنت عايزه أقول رأيي في حاجه بقى مع اني عارفه اني طولت أويييييي :$:$:$:$
البنت اللي عندها مدونه ومثقفه ومتعلمه بيكون ليها مواصفات مختلفه للراجل المثالي من وجهة نظرها عن البنت العاديه وكمان درجه التعليم والثقافه بتفرق في اختيار المواصفات دي

وكمان موضوع البنات اللي لبسها ومكياجها غير لائق مش عارفه بصراحه بيمشوا ازاي في الشارع كده وازاي بيخرجوا من بيوتهم كده أصلاً

تسلم أفكارك :) وسوري على الاطاله

Salwa said...

Rehab Mostafa
أديني برد عليكم واحده واحده أهو

وبرضه الرجاله مش راضيه تدخل في النقاش

ماليش دعوة بقى
أهو النم شغال على ودنه

شوفي يا رو

أولا إوعى تقولي طولت دي
دي المدونه مدونتك
يعني إتكلمي براحة راحتك

وبعدين إنت كلامك ومواصفاتك بسيطه وجميله

وبرضه لاحظت حاجه مهمه هي نفس اللي لاحظتها قبل كده

بس برضه هقولها آخر البوست

نورتي يا رحاب وعلى فكرة لسه جايه من عندك
بوستك الأخير مرييييييييييح جدا جدا
بارك الله فيكي

رئـــــيسـة حزب الأحلام said...

انا عن نفسى عاوزة راجل حنين ولماح وعنده طموح ومايكونشى بخيل
ومتدين وصاااااااااااادق فى مشاعره
وياريت يكون مابيعرفشى يكدب
ولو لقيتوالمواصفات دى ابعتوها على البيت
تحياتى لجميع العمالين فى المدونة

منى said...

حسن الخلق واللسان يفكر فى مشاعر غيره قبل اى تصرف
يوقن ان من يتق الله يجعل له مخرجا
ويكون مقتنع بيا

ها عندك من ده
صعب مش كده
بس انتى لسه مقلتيش رايك على فكره؟؟

Soooo said...

ياساتر
حد من الحريم خالع راسه ولا حاجه؟؟؟

انا شايفكم بتقولو عايزين وعايزين وعايزين
الله
طب ماحنا كمان عايزين

عايزين اللي تفهمنا من مجرد نظره
اللي تحسسنا اننا كل حاجه في حياتها
اللي وقت اللزوم تبقى في حنان الام
وجنون وشقاوة الطفله
وصدق الاخت والصديقه
عايزين اللي ماتقولش هات على الفاضي والمليان وماتبصش لغيرها وتكون قنوعه وتقول الحمدلله
عايزين اللي بجد تكون ست بيت .. بغض النظر انها تكون بتشتغل ولا لأ
وقصاد كده هتشوف مننا كل الحنان والرقه والجنان والصدق والامان

موضوع عايز يتقال فيه كتير
بس انا جعت الحقيقه
وهقوم اعمل اي شندوشت


اللي مافي واحده منكم قالت اعمللك شندوشت بلوبيف حتى؟؟
بقولكم جعان .. تقومو تنفضولي؟؟؟

قال ايه .. عايزين يتجوزو قال


ربنا يوفقكم ويسعدكم ويبسطكم ويكرمكم ويرضيكم دنيا وآخره يارب




سلاموووووووووز

klmat said...

طبعا ان عديت المرحله دى
الرجل من وجهه نظرى انسان تقى يخاف الله
كريم رجيم زكى وطموح مثقف متحمس للحياه ومحب
لها يقدس العمل وحب الاسره
بس
ربنا يسعد كل البنات وكل واحده تقابل
فتى احلامها ويكون بينهم موده ورحمه

Salwa said...

رئـــــيسـة حزب الأحلام

يعني مش تيجي إلا بدعوة رسميه
ينفع كده

أنا عايزاكي هنا على طول
لأنك دمااااااااااغ
هههههههههههههه


مواصفاتك جميله ومش مستحيله

وكله موجود إن شاء الله

بس عنوان البيت

تابعينا

Salwa said...

منى

بس كده

كلمتين وبس يا منى

طول عمرك بسيطه يا بنتي

بس برضه جايه بدعوة

أنا عايزاكي مقيمه هنا

وما تقلقيش كله موجود

ورأيي قادم إن شاء الله ما تقلقيش
ههههههههه

Salwa said...

Soooo

وجه مندهش
راااااااااجل
يا خبررررررررر

ما تخافش يا سوووووو

الكل لابس راسه والحمد لله
:)

بس أدخل برجلك اليمين

الموضوع مش موضوع جواز

إحنا بس عايزين الرجل يعرف
المرأه بتشوفه إزاي
وإيه اللي ممكن تطلبه وإيه اللي يخليه مثالي في نظرها

والعكس طبعا

وطبعا أختي كانت جانبي الوقت
بتقولي الراجل الوحيد اللي علق لسه مش رديتي عليه
أهو يا ست نجوى أديني برد

ده سوووو يا بنتي وأول مرة يزرنا

وعلى فكره إنت برضه طلباتك بسيطه

شفت إحنا عايزين نوصل للبساطه بعيد عن العقد

ربنا يسعدك يا سوووو
إنت عرفت السكه
زيارات بقى

وبعدين عندي سؤال مهم

هل أنت عملت حسابنا في الساندوتشات ولا لأ؟؟؟

اللي بيجي هنا بيجيب ساندوتشات .. ساقع .. سخن
المهم يجيب حاجه والسلام
:)

ربنا يحفظك يا سووووو

Salwa said...

klmat

أميرتنا

طبعا أنا هعتبر كلامك ده حكمه كبيره
ناتجه عن خبره

ربنا يسعدك يارب
ويديم السعاده والهدوء والأمان والأستقرار علي بيتك وأسرتك

youma said...

حد عايز يااااااااااااكل؟؟
معايا بلوبيف

بس لستات بس

بقى راجل واحد يخش يعلق
وعايز رشوة كمان

كتب كلمتين وعايز شندوتش ومستخسر فينا التعليق


بس معلش قلبي طيب برضو

لو حد مش عاوز نصيبه حأديهولك

وش بيشمت

Salwa said...

youma

أهو كده

هي دي الجدعنه

جايه ومعاكي ساندوتشات كمان

كده القاعده بقيت تمام

نورتينا يا يوما

محمد الكومي said...

انا مستغرب يعني انا لما احب ارتبط بواحدة عندها مدونة اجيبلها خمس ست مدونات في مكتوب بقى و بلوجر و ياهو و مصراو ي
و بلوج سبيريت

انا شايف انكم كبنات تتجمعوا و تحددوا طلباتكم مننا و تعلنوها مرة واحدة

و برضه مافيش فايدة

انا ملك الكبدة على فكرة يا جماعة بس غيرت الاكاونت و البلوج كمان بقى في بلوج جديد عالاكاونت ده

سلاماتي و تحياتي

اه صحيح

فتاتي المثالية

متعلمة مظهرها حلو

لبسها شيك

ذكية و حنونة

ammola said...

ازيكو يا جماعة
للاسف يا سلوى
طلبى مش موجوووود خالص
حاجة كده زى الثلاثى بتاع الغول والعنقاء ومش عارف مين
ياللا...ماتعملوش حسابى
بس حاتابع علشان الموضوع جد سيريس
:)
وبعدين يعنى ايه نجيب معانا سندويتشاتنا؟؟
يخونك الباتيه والكورواسو اللى لحوسولى المدونة؟؟
وانتى بالذات بأه خلصتى الأيس كريم كله
مستنية على ناار نتيجة الموضوع ده
بس مش عايزين ضرب ناار
:)

راجى said...

شوفوا بقى يابنات
البنت النموذجية هى التى لاتنتظر الثواب من الزوج او الاولاد بل تطلبه من الله
فاءذا احسنت التبعل للزوج فيكون ذلك ابتغاء مرضات الله واذا احسنت تربية الاولاد فلوجه الله و هكذا فى كل احوالها
والشرط انها لا تتغير عن تلك الحال واذا حادت وتذكرت عادت تائبة الى ربها
هذه البنت اذا سعدت فى الدنيا فهذا فضل من الله واذا شقت بعد اجتهادها فطبعا كلنا عارفين اين الجزاء الاوفى
فهل منكن من ترضى بهذه الصفقة؟

يوميات فنانه مفروسه جداا said...

شوفي يا ستي

الراجل مش بس بكلمته الراجل برعايته لبيته واسرته

هههههههههههههههههههه

راجل ايه يا حبيبتي والله كلهم ماتو في الحرب قله قليله اوي موجوده الا من رحم ربي يعني

بس عالموم يعني اهو الواحد بيحلم وخلاص

لازم يكون كده راجل بكل ماتحمله الكلمه يكونلي اب واخ وصديق وعائله ومؤي وحنان وحزم
يحترمني ويحترم اهلي ويقدرهم
يكون قادر علي اتخاذ قراراته بنفسه مش لسه هيسأل ماما وبابا قبل ما يعمل اي حاجه

بالنسبه بقي للبنات والمكياج واللبس والكلام ده يعني كل واحد حر وبعدين والله ما باللبس
ربنا يهدي بقي

انا طولت عليكي بس الموضوع ده كان فارسني شويتين اكمني مقروسه منه يعني
زيارتي الاولي هتتكرر تاني بعد اذنك طبعا
سلام

تــــــــــ(حـنة)ـــــــر said...
This comment has been removed by the author.
تــــــــــ(حـنة)ـــــــر said...

ها فى كرسي و لا المدونة كومبليت
يلا مش مشكلة بقى
انما حلوة قوى حكاية الرجل والمرأة وبيشوفوا بعض ازاى
بصراحة يعنى دا اختلاف فى وجهات النظر
يعنى فى بنات كتير بتحب يكون زوجها زى والدها مثلا ودى بقى بتكتشف بعد كده
ان الأب أب نموزج لا يستحق التكرار لكن يستحق التقدير والطموح فى حد أعلى كمان من والدها
وممكن تحبه يكون زى مدرسها فى المدرسة او استاذها فى الجامعه
وترجع تكتشف انها حاجة جامدة و ان الطابشيرة والقلم الفلومستر مكانهم فى المدرسة و الكلية بس
هههههه
دى دوامه باين يا سلوى
انا عن نفسي احبه يبقى رزقى
جديده ها مش كده
بس والله بجد احب يبقى رزقى اللى جايلى من عند ربنا واللى بجد حقول عليه الحمد لله
ويارب يبقى خير
دا رأي لكن اللى شايفه حاجة غير كده اوعوا تقوموا عليا بثورة بناتى و تاخدوا منى الكرسى
ابقى حوشي عنى بقى يا سلوى
سلام بقى
اصل الضرب باين حيبقى فى المليان

monaliza said...

بصى ياستى نظرتى للراجل تكمن فى تصرفاته وافعاله ومش مهم بقى هو عنده مدونة او لا المهم هو رجل قد المسئولية ولا لا
هيقدر يحافظ عليا ولا لا
كلمته لوحدها تغنى عن اى عقود مختومة ولا لا
الرجل من وجهة نظرى فعل قبل اى شئ اخر
لو قابلتوا حد كده متفرطوش فيه ابداااااا

عروسة ننوسة said...

انتى فين...لسه مكتبتيش حاجة جديدة؟
انا مستنيه

Shimaa Gamal said...

موضوع جميل جداً ، الست و الراجل طلباتهم بتختلف مع إختلاف إحتياجتهم و إختلاف أفكارهم .
الراجل عايز الست الكاملة ، جميلة كاملة الجمال و دمها خفيف و ذكية و عاقلة و حنينة و مخلصة و بنت ناس و تعرف ربنا كويس و تنفع تكون أم لعياله و ست بيت . لكن لما بيجى ينقى دائماً بيجرى من فتاة أحلامه علشان كاملة الأوصاف دى بتزنقه فى خانقة العقد النفسية . فبيختار واحدة مش كاملة قوى علشان هى دى اللى يقدر عليها .
الست بقى بتبتدى بأمير على حصان أبيض خالى من العيوب و تبتدى تضحى بحاجة بعد حاجة كل لما تفهم فى الدنيا حتة أكبر . لحد ما توصل إنها تقبل عيوب و طلعلها بنى آدم علشان الكمال لله وحده .

ادم المصرى said...

السلام عليكم
*****
انا جيت بس باين كده جيت متأخر المهم

الى اعرفو ان البنت اهم حاجه عندها لما تجوز راجل او تحب شب انو ميكنش شايف غرها فى الدنيا كلها وتكون هيا رقم واحد واخر رقم بردو
**********
تانى حاجه
يحسسها ديما انها اجمل بنت فى الدنيا وحياتو ورحو وعقلو وامو واختو وكل علتو هيا
********
تالت حاجه
يكون رومنسى اوى اوى اوى معاها فكل حاجه ويكون متفاهم ومع زالك يكون شديد وقت الازم عشان متحسش انها مجوزا كيس جوافا كل حاجه حاضر ونعم لا وقت الجد مفيش حاضر ونعم فى لا وتفاهم ونحل المشكله
البنت نفسها فى راجل يكون ميخدش رأى ممتو ولا يدخل ولا يفضل عليها حد
يكون حنين اوى معاها ويكون فهمها
***********
بس فى حاجه تفتكرو لما واحد يعمل كل ده عشان وحده
........
تفتكرو هيا هتعمل ايه عشانو هترفد النعمه وتقصى عليه زى العاده يعنى ولا هتبدلو نفس الشعور؟؟؟
اتمنا من الجميع زياره مدونتى
....
مملكه الزمن الجميل

Jana said...

يا سوسو ..يا توتو
انا سبت عمور على باب المدونة لما لقيت الدعوة فيها
نتمنى للاطفال نوما هانئا
:)
اسمحولى ادلى بدلوى فى هذا الموضوع
الرجل ...يعنى ميكس بين كذا حاجة ممكن تكون متناقضة مع بعضها ..لكنها لازم تتجمع فى نفس الرجل لتظهر كل منها فى وقتها

اولهم على الاطلاق انه يعرف ربنا كويس ويعامله فيها
حنين ..ودى اهم صفة ..وبتحتاجها اى واحدة من شريك حياتها فى اوقات كتير
صارم ..لأنك احيانا لو اتصرفتى لوحدك حتغلبك العاطفة وتبوظ الدنيا فلازم يكون فى مواقف معينة هو وحده صاحب التصرف
صاحب كلمة حق
ذكى
قوى
شجاع
سند وظهر ليها
رومانسى..وان مكانش يبقى يتعامل برقة مع رومانسيتها
يحبها
ميحتاجش غير ليها وحدها
بس كده

وعشان نبقى منطقيين
هى لازم تحس بده وتقدره
فتظهر منها احلى الصفات وتصبح اكثر منه مثالية

انا عايزة عصير بس وشكرا معايا الشاليموه مش حاتعبكم

Salwa said...

إتأخرت عليكم
معلش المواصلات بقى :)

محمد الكومي

ليه بس مستغرب
تخيل كده وإنت رايح تخطب وكل رأسمالك مدونات :)

وبعدين بس البنات هتجتمع إزاي يا محمد
ولو اجتمعوا يا تري هيتفقوا على إيه؟

يعني إنتوا تقدروا تجتمعوا وتتفقوا على حاجه ؟

إن شاء الله ربنا يرزقك بما تتمنى
بس خد بالك المظهر مش كل حاجه

نورتنا بجد وفي انتظار متابعتك

**********************************************

ammola
إيه يا أموله ده
مين قال طلبك مش موجود

إوعى تكوني عايزاه بتلات عيون :)

وأيوه تجيبي الساندوتشات معاكي
إحنا عاملين حسابنا على كده

وبعدين يخونك النسكافيه
يعني نسيح بقى ههههههههههه

في انتظار متابعتك حبيبتي

Salwa said...

راجى
كلنا نبغي وجه الله
بس قبل الزواج شئ وبعده شئ
مثلا قبل الزواج
من حقها تحلم بالسكن والود والرحمه
من حقها تحلم بالشخص اللي شايفه إنه هيكون سند لها

أصلها إنسان ومن حقها تحلم

أما لو تزوجت بقى وكان الزوج نوع من الإبتلاء
فلازم تصبر وتحتسب
بس برضه لدرجه لأن الناس مش زي بعض
في ناس تصبر لآخر نفس
وفي ناس لأ

وما ننساش إن
ربنا لا يحمل نفسا إلا وسعها

مش عارفه بس دي وجهة نظري

بس بجد إنت شرفت المدونه دي
دي طبعا أول زياره وياريت مش تكون الأخيره
في انتظار متابعتك

**************************************

يوميات فنانه مفروسه جداا
إيه النور ده
وإيه الأحلام الحلوة دي

إحلمي طالما الحلم مشروع ولا يهمك

وبعدين أنا بس خايفه من حاجه
إنك تلاقي المواصفات الحلوة دي
وبعدين تقومي تفرسيه :)

لأ لو لقتيه حافظي عليه وما تقلقيش هو هيتفرس لوحده
بس بلاش تيجي منك

إنت نورتينا بجد
وفي انتظار متابعتك
زيارات بقى
وشكرا جدا لسؤالك يا حبيبتي
ربنا يخليك ويحفظك

Salwa said...

تــــــــــ(حـنة)ـــــــر
يا خبر .. أحلى كرسي لأحلى تمرايه

جميل قوى إنه يكون رزقك
جديده وجميله
ربنا يرزقك باللي بتتمنيه يارب
وبعدين ما تخافيش أبد
دي كل البنانيت طيبين خالص
آآآي كده أهو الكرسي جه فيا قصدي في الكلوب
:) :)

في انتظترك تاني
إوعي تتأخري

************************
monaliza
إزيك يا مونمن
وإيه الكلام الحلو ده

ربنا يرزقك باللي بتتمنيه يارب

وطبعا مش تفرطي فيه :)

في انتظار متابعتك

Salwa said...

Shimaa Gamal
إيه الحكمه دي
فعلا كل واحد بيحلم
وفي الآخر الحلم ده .. الله أعلم به
نورتينا يا شوشو
زيارات بقى
************************
ادم المصرى
ولا متأخر ولا حاجه إنت شرفت المدونه
وبعدين حضرتك قلت كلام جميل جدا
أما سؤالك الأخير بقى
لأن كل إنسان بيختلف عن التاني
يعني في واحده ممكن تقدر ده
وواحده ممكن تستغل ده
عموما ربنا يوفقك للي تقدر نا تقدمه لها
في انتظار تكرار الزياره
وعلى فكره مدونتك جميله
ربنا يوفقك

Salwa said...

Jana

يا لولو
نورتيني إنت وعموره

كلامك جميل على فكره
وحلاوة الصفات دي ما شاء الله

وحلوة موضوعيتك في كونها لازم تقدر ما يقدمه وتظهر افضل ما عنها

بس أنا زعلانه منك
لأ زعلانه صحيح

عايزة عصير؟؟؟

مش عارفه إن كل واحد جايب عصيره معاه
صحيح إنت جايبه الشاليموه
لكن برضه مش ينفع كده

عموما المرة دي سماح
وهاتي الشاليموه ده
أحسن السلاح يطول

في انتظارك دايما
ربنا يحفظك يا رب

L.G. said...

عارفة ليه مكتبتش رد لأني معدتش عارفة حاجة ولا عايزة أعرف حاجة

الرجل النموذجي عندي اللى بالذال مش بالزين :)))

وممكن نمحيه خالص وده أسلم حل

بنت سيناء said...

اولا يا سلوى واى بنت هنا..كلمة عايزة واحد يكون كذا وكذا دى سبيها لله ..لاننا ياما حطينا مواصفات وشروط وبنسمع ان النصيب بيكون عكس ذلك او فية بعض من الصفات ..يعنى ةاللى كاتبة ربنا هيصير شئنا ام ابينا..اما عن العلاقة بين الرجل والمرأة بجد بيرجع لتعامل كل واحد للاخر ..بس حاجة واحدة اقولهالكم..ثقو فى اختيار ربنا ليكم وان كان فية الكثير من الاخطاء..حاولو تغيروة او تتغيروا انتم..لان فى الاول والاخر اختيارنا محدود ولا نعلم الغيب..ممكن يكون انسان ادامك فية كل الصفات اللى بتحبيها وبعدين زى ما بيقولو..اللى تحسبية موسى يطلع فرعون..

L.G. said...

بنت سيناء

ياه أهلا بكل أهل سيناء حتة في القلب عزيزة علينا كلنا
اسمك لوحده كفاية

انا قلت كده برضه بعد الجواز نصنفره :) عاجبك يا ستي سلوى قمصانة من الدنيا وسايبه المدونة يرضيكي
تحياتي

صباح الصباح said...

اسلوب جميل احييكى علية
اما المواصفات والكلام عن فارس او مهرة الاحلام والحركات دى سيببببببك من كل دة
الفاس لما بتيجى فى الراس كيوبيد يضرب سهمة تريك فى القلب حتى لو كان الشخص التانى دة نسناسة صغننة هنشوفوة بعين الحبيب مارلين مورنو على راى المعلم حنفى
تقبلى مرورى مع خالص التحيات