كلام بنات ؟
يا تري البنات بتقول ايه ؟ بس يا جماعة من باب الأمانة عندي وجهة نظر
يا تري البنات بتقول ايه ؟ بس يا جماعة من باب الأمانة عندي وجهة نظر
هي مين البنت ؟ في اعتقادي البنت من سن 10 : 20 بس في مصرنا المحروسة فيه
ارتباط وثيق بين كلمة بنت وعذراء ولكن مع التغيرات الاجتماعية لو قلنا بنت يعني عذراء
مش صحيح فيه عذارى تخطوا الستين دلوقتي يعني لو البنت مثلا 25 ولم تتزوج تبقى
بنت لأ هى امرأة شابة أو امرأة صغيرة السن لأن خبرتها بالحياة أصبحت أكبر وأتمت تعليمها وخرجت لمجال العمل
لذا وبناء على ما تم تقديمه معرفتش أكتب ايه لما العزيزة سلوى دعتني للكتابة عن كلام البنات بقالي مدة بعيدة شوية
عن مجتمع الجامعة وخلافه ولكن طرأ على فكري شئ طالما زهقني وزعلني من الرجالة والستات وكل الناس
عارفين ايه ؟؟
الجميع يفضلونها غبية
كان فيه فيلم لمارلين مونرو اسمه كده وتصوروا في رأيي عندها حق 100 % ليه ؟ أأقولكم تعالوا معايا نشوف في
المدرسة مكدبش المدرسين كانوا بيشجعوا ذكائي جداً وصدقتهم وقعدت أأقرأ وأكتب وأسأل وكنت دودة قراية وبعدين
بدأت أكبر
في البيت محدش عايزني أبقى ذكية واضح ان عشان انت الصغير مينفعش تفهم أكتر من الكبير بس في نفس الوقت
مش بتسكت وبتقول رأيك لدرجة اللي حواليك يقولوا ياريتك كنت غبي شوية
وكبرت حبة كمان ورحت الجامعة ياه زمايلنا الصبيان حد فهمهم غلط إن البنت مش زي الولد مع ان سعاد حسني
غنت لصلاح جاهين وقالت البنت زي الولد ماهيش كمالة عدد
بس لأ مينفعش في الرحلات زمايلنا الولاد قارفنا ومش فاهمين حاجة وطبعا البنت الأذكي دي الأفضل نحسبها ولد
زميلنا ماشي وماله حتى عشان محدش يضايقني
وبعدين رحت الشغل ياااه محكيلكوش بأه يا بنات ياساتر يا رب نار جهنم واتفتحت عليّ ازاي الموظفة البنت تفهم
عن المدير الراجل والأوحش تفهم عن المدير الست ليلتك مش فايته
الكل عايز البنت غبية عشان يعمل عليها ذكي هو وعشان موقع سلطته ميتهزش صحيح ازاي مدير أحمق حيمشي
موظف ذكي على عجين ميلخبطوش طبعا حيلخبطه
ونسيب الشغل بأه ونيجي للطامة الكبري جالك عريس يعني ايه دماغه مش عاليه حنجيبلك واحد تفصيل ؟ يعني ايه
ذكاؤه وأفقه محدود ؟ ده دلع بنات والبطران سكته قطران واسمعي وشيلي في قلبك ولا حد حاسس بيكي .
الحل ايه ما قولتلك يا بنتي الجميع يفضلونها غبية لكن اذا كنت ربنا امتحنك بالذكاء فاصبري وصابري وربنا ان
شاء الله يجعل لك من كل ضيق فرج
يعني الأصحاب مقدور عليهم الزملاء في الشغل متتكلميش معاهم ولا تصلحي أخطاءهم والشغل يبوظ مش مشكلة
صدقيني أحسن ميت مرة ما توجهي حد
المدير والمديرة سياسة لا أسمع لا أرى لا أتكلم
ماما وبابا وكبار العيلة سكتم بكتم لحد ما يطلبوا رأيك متتبرعيش بالرأي اوعي أحسن يقولوا انت يا بنت امبارح
حتعرفي أحسن من كبار العيلة
الجواز قدماك طريقين ما فيش غيرهم
تاخدي أي عريس ومتفكريش كتير وتعملي معاه زي بابا أو تستني فرج ربنا وتدعي ربنا يبعتلك واحد زيك مبتلى
بالذكاء شوفي تقدري على ايه واعمليه
على فكرة فيه ناس حتطلعك غلطانة مهما عملت أصل اسلوبك أصل طريقة أصل ألفاظك والله لو وقفت على
طراطيف صوابعك مش حيعجب صدقيني لازم اللي قدامك يكون عنده ثقة بنفسه وحتى لو في موضوع مش ذكي
مش مهم يعني انت مش ذكية في كل حاجة ولا انت عارفة كل حاجة بس هما عايزينك تحت طوعهم وخلاص مع ان
زمن الجواري راح وانقضى وكل شئ فيه خلاص مضى وعجبي
طبعا بطلي قراية
15 comments:
يــــــــاه ده انتي كاتمة في قلبك وساكتة كل ده
كمان لوكانت غبية كانت تعبتهم اكتر واكتر دول عايزينها فصالة
تبقي ذكية بس تتكلمي امتى ما يعجبهم بالرأي لي يعجبهم وماتتكلميش واطنشي كمان وقت ما يعجبهم
يعني لا كذا عاجب ولا كذا عاجب
وعجبي
إيه يا بنات في إيه
كده تنزلي البوست من غير ما تقولي لي
ماتشي يا لولو
المهم
أنا دايما مؤمنه أن لكل قاعده شواذ
يعني البعض يفضلونها ذكيه
أصل غبيه دي حاجه صعبه أوى
يعني اللي هيتجوز واحده غبيه
وده طبعا حسب طلبه
هيشوف الويل .. وهيعرف غلطته
أصل هو ناقص يشيل حمل فوق حمول الحياة
وما أدراك ما حمل الغباء بعيد عن السامعين والقارين
المهم
ده موجود .. وده موجود
والمرأه بذكائها تعرف
متى تستعمل ذكائها
ومتى تتغابى
في كل الأحوال المرأه فيها من الذكاء ما يجعلها تعلم كيف تتعامل مع الأمور
دون أن تفسد الأمور
تحياتي
تعرفي حاجة
بعد كل يلي كتبتيه
عرفت ان التغابي أحسن شيء
وخاصة بالمجتمع يلي بتترأسه عظمة الرجال حتى في سن الخمسة سنوات
بيحكو على الولد وهو لسى صغير انو راجل
بينما البنت بيعاملوها معاملة الضعيف من وهي صغيرة
دا مجتمع ووضع بس مش مشكلة
وهنى الفرق
وعلى كلمة يوما
عاوزينها متفصلة تفصيل
ربنا يجيرنا
انا افضلها حنونة
و بعد الحنان كل شئ يهون
أعزائي
يوما أأقول ايه عندك حق
=============================
سلوى معلش ما بصدق الاكتئاب واليأس يناموا شوية بكتب بسرعة قبل ما يكبسوا على نفسي تاني مشكلتي اني طبيعية ومبحبش أمثل وأقعد أفكر اتغابى المرة دي أسكت المرة دي ليه مقدرش أعيش على حريتي وطبيعتي زي الراجل شايفاه بيراعي ان الواحدة عيانة زعلانة لا طلباته المفروض مجابة وقت ما هو يحب سواء أب زوج مدير صدقيني الدبلوماسية بتخنقني ليه أبذل مجهود في التعامل وهل أعامل بالمثل ؟
مع ان الذكية زي ما بتقولي حتشيل حمول وحتفكر ومش حتوقعه في مشاكل بس مين يفهم ويقدر
===============================
ليندا
أيوة يابنتي في العلوم السياسة منساش كلمة قالها الدكتور في الجامعة من يتولى سلطة يتدلى بها الى الاستبداد ياريت يا جماعة ما نعاني منه منكرروش مع أولادنا أو تلاميذنا أو من هم معنا في العمل نكسر الحلقة المفرغة
===============================
ملك الكبدة
عايزها حنونة يعني شكلك كده عايز تدلع نفسك طب فكرت انك الأول تبقى حنون المفروض الراجل قائد المسيرة فإذا كان طيب عارف ربنا تفتكر مراته مش حتصون عيشه وملحه وترعي فيه ربنا هي كمان
================================
يا جماعة الكلام على كل من له سلطة على البنت وكمان المجتمع ميقرفش الزوج مثلا ويقولوه ازاي مراته بتتكلم وانت قاعد انت مش عارف تحكمها والحاجات دي وليه رأي البنت محدش يسمعه حتى لو عيلة
اسمعوا يا أمهات يا أبهات يا مدرسين يا مديرين احترموا البنات شوية وشوية كمان ودمتم
معلش يا جماعة أصل الموضوع ده عقدني في الذكاء لدرجة اني حسيت انه ابتلاء مش نعمة
لأ يا عزيزتي
أقصد أنه ليس كل الرجال زي بعض
البعض يريدونها زكيه والبعض يريدونها غبيه
البعض يريدها حنونه كالأخ ملك الكبده
يعني العقول بتتفاوت
زي النساء بالضبط
بعضهن تريد زكي
وبعضهن تريده لا يناقش
وهكذا
يعني في كده .. وفي كده
وطبعا لما قلت أن المرأه تعرف متى تظهر زكائها ومتى تتغابى
لم أكن أقصد أن تظهر ما ليس بداخلها
أو تنافق
ولكن كنت أقصد
أنها تستطيع أن تصل لما تريد دون مشاكل
ثم هذه الطريق تستخدمها مع من
مع أسرتها .. مع زوجها
كلمه حواء من الإحتواء
أي أنها تحتوى الجميع إن أرادت
خالص تحيااااتي
افضلها
حنونة
قوية
عصبية وهادية
وتكون بتعرف تطبخ
مسقعة
على فكرة مش المجتمع كلة فية العيب دة
ولازم تعرفى ان المجتمع اصلا بيتغير
وانا
بقول رايى يعنى
بحترم ذكاء المراة احسن من الراجل
وبعترف ان المراة اذكى من الراجل
فى الامور الاجتماعية
فعلاً هي دي مشكلة ماما انها ذكيه بس أهي ذكيه والحمد لله بقت ماما :) يعني في رجال كتير بيحترموا المرأه الذكيه زي الاخ اللي مش فاهم حاجه مثلاً
وأنا عن نفسي لاأفضل الغباء ولا بطييييييق الغباء ولا أحب أن أكون غبيه
ولا أحب أتكلم مع حد غبي أصلاً أساساً
شكلى كده هتعب أوي :(
بس أنا هعمل الحل التاني واستنى حد يكون ربنا مبتليه بالذكاء علشان فعلاً مش بستحمل الغباء
واحد مش فاهم حاجة
طبعا أكيد فاهم حاجات بس على فكرة بتكلم يا جماعة على الأغلبية طبعا فيه ناس غير كده ولكن قلة قليلة جدا جدا جدافي الستات والرجالة والله وحتى احنا أحيانا بحس اني دكتاتورية مع أولاد إخواتي بس الحق براجع نفسي وأحط نفسي مكان الطفل وأبطل استبداد كل واحد بيستبد في نطاق صلاحياته
على فكرة المرأة ذكية اجتماعيا وعلميا وكله الذكاء فرد لا راجل ولا ست زي الغني والجمال رزق من عند ربنا بس الراجل لو ذكي حلو جميل لكن المرأة يييييه حتصدعنا
==============================
رحاب الحمد لله ربنا يخليلك مامتك نعمة تشكري ربنا عليها والله بجد لأنها حتوفر عليكي مشقة كبيرة في الحياة
وعلى فكرة عادي نتعامل مع غبي مين فينا أذكى الأذكياء بس أحيانا بشعر بذكاء بعض أصدقائي عندما يتقبلون رأيي في أشياء لأني مثلا ذكية علميا وصديقتي ذكية اجتماعياوأخرى لها ذوق في الموضة تكامل المهم الواحد يعرف منطقة ذكاؤه ومنطقة غيره ويحترم ده
الرجل يحب أن يكون على القمة وحده هنا تكمن المشكلة
متنسيش نشوف الغلة يا سلوى في الصندوق متنسيش :)
أنسى إزاي
وإحنا علينا كومبيالات يا بنتي
ربنا يزيد ويبارك في الصندوق
اللى عليز غبيه ياخد واللى عليز ذكيه ياخد كله موجود
لكن المشاكل بتحصل لما بيبقوا مش قادرين يحددوا هما عايزين ايه بالضبط
او لما كل واحد يبص على حقوقه بس وميفكرش واجباته ايه
بيتهيقلى انا بعدت عن الموضوع
استحملونى شويه ماهى قعده بنات بقى
بسم الله
وماتشاؤن الا ان يشاء الله **
**
عزيزتي .. الحياة فيها حاجات كتير احلي من الزواج **
مع تمنياتي بالسعادة
الدائرة
عزيزيتي خير متاع الدنيا الزوج / الزوجة الصالحة طبع االمتع متعدد بس الجواز حلو برضه نص الدين رفقة وأمل وأسرة وعيال حنجيب العيال منين
نسيت البوست ان الناس مبتحبش الذكية ويمكن ده أسباب عدم زواجها إن كان على الجواز أحيلك لموضوع أيوة عانس تحياتي وآسفة على التأخير في الرد :((
Post a Comment