نسـاء حـائـرات

في عالم النساء تجدهن دائما حائرات في أي حال كن . فالمرأة غالباً لا تشعر بالسعادة وهي وحيدة أوإذا تزوجت ظلت حزينة حتى تنجب وإن انجبت ثقلت عليها المسئوليات وارهقتها .

عندما أستمع لصديقتي المتزوجة ولم تنجب تقول لي أني افضل حال منها وإن استمعت لصديقة تزوجت وأنجبت تقول لي نفس الكلمات وعندما أستمع لصديقة مثلي تتمنى الزواج والأسرة والأطفال اجدها تعيسة . أخذت أتفكر فيما نقول جميعا وأثق أن كلنا نقول الحق ولكن ... وجدتني أقسم النساء الحائرات لثلاثة أنواع من المياة .. نعم المياة

القسم الأول : الماء العذب وهي المرأة التي تزوجت في وقت مناسب وأنجبت أولاد طيبين ولها زوج متناغم معها تلك المرأة مثل النهر ماؤه عذب ينشر الخير حوله وتجد الأراضى حوله خضراء وماؤه صاف يجري في سلاسة حتى يصل لمصبه وفي النهر تجد الأسماك طيبة المذاق فلها اطفال ينعمون بالحب والحنان ولا تجد حولها الا كل خير . هذه المرأة تحيا حياة طيبة حتى نهايتها وتعيش في يسر ورغد من العيش مهما حملت مياهها من طمي في بعض الأوقات فهناك اوقات يتسع فيها النهر وهناك بعض الجنادل ولكنها لم توقف النهر يوما عن جريانه ولم تمنع أسماكه من السباحة فيه ودائماً النهر اقوى من الجنادل .

القسم الثاني : الماء المالح أو البحر وهي المراة التي تزوجت بمن لا تحب أو زوجها شخص غير متناغم معها هو ايضاً ماؤه جار يتحرك ولو أنه يعصف احيانا وبه دوامات شديدة ولكنه يظل ماء طهور به أسماك البعض منها متوحش ومفترس والبعض يعيش ويتأقلم .. تلك المرأة أيضاً لها حياة ولها أطفال قد لا تكون سعيدة وقد لا تنمو حولها حيوات أخرى وقد تجد مع تلك الملوحة في الماء جواهر مثل اللآلئ تتكلس وتظهر رغم ذلك وأعتقد أن أغلب المبدعين من عانوا في حياتهم وليسوا من عاشوا في رفاهية نفسية بدون مشاكل .

القسم الثالث : الماء الآسن وهو الماء الراكد وهي المرأة التي لم تتزوج ولم تنجب لا تجد حولها حياة ولا في مياهها تجد أسماك ولا جواهر هي مياه معطلة آسنة لا يشرب منها أحد ولا يسقى منها زرع وسوف تجف يوماً ما أو تردم وتمحى من الوجود. هي كمستنقع من يقترب منها يمرض قد تكون كانت من نبع صاف في البداية ولكنها عزلت واصبح ماؤها آسن .

قد لا تجد جواهر بالنهر ولا تجد أسماك قرش به ايضاً وقد يعصف بك البحر. ولكنهما في حالة تحرك في حالة حياة هناك امل إما أن تصل للمصب بهدوء او تلامس عنان السماء .

صديقتي لا تقولي لي أنني في حال افضل فكما أتفهم وجود الجنادل في حياتك أو عواصف موسمية في بحرك رجاء تفهمي اني بدون حياة .

البنات الوحشين اللي بيشتموا !!!

الله يحرقهم بجاز وسخ ولاد الجزمة

ده كان تعليقي بعد ما اتفرجت على فيديو ياسمين البرماوي وهي بتحكي ازاى تم التحرش بيها ومحاولة اغتصابها فى التحرير وسحلها وضربها ورفعها على عربية لمدة سبعين دقيقة من الاهانة والوقاحة والسفالة

واللي يغيظ اكتر بقى لما تلاقى حيوان يقولك ماهى غلطانة اللى نزلها مظاهرات تستاهل

اولا انت مال امك هي راحت فين ولا جت منين هي حرة

ثانيا هو الدم والنخوة والاحساس انعدموا عند البُعدا اللي مش شايفين من بشاعة اللي حصل وفُجره غير ان البنت هي اللى غلطانة ؟ ده بدل ما يبقى قلبك مولع نار لان بنت حصل معاها ده ونفسك مثلا تولع فى اللى عمل فيها كده ؟؟؟  هي دي الرجولة ؟؟ اه نسيت معلش الكلمة دي انتوا ماتعرفوش عنها غير شكلها

التدوينة دي مش عن التحرش بس ان شاء الله هكتب تدوينة مخصوص عنه

التدوينة دي عن  البنات الوحشيين اللى لسانهم طويل وبشتموا ع الفيس بوك او مدوناتهم :)

ايون زي انا مثلا كده او اللي بيقولوا الفاظ عيب اوفر اكتر من الشتيمة العادية

فى العادى لما بلاقي راجل ع الفيس هو اللي بيشتم بمسحه انما لو بنت عادي ... لاء مش عنصرية او عنصرية عادي براحتي

المهم انها ظاهرة زادت فى الفترة الاخيرة انا للوهلة الاولى بتصدم لما بشوف ألفاظ أبيحة من بنت وبعدين برجع استوعب مدى الكبت اللى احنا بنعيشه والقهر اللى بيحاول المجتمع يفرضه علينا والاقي مبررات كافية انها تخرجنا عن شعورنا

المجتمع بيتفنن في ممارسة كافة انواع القهر والعداوة والغباوة تجاة الأنثي بصفة عامة

يعني مثلا كل الدعاوي اللى بتنادي بالحد من حرية المرأة بكافة اشكالها سواء بالتزام البيت او عدم تشجيعها  ع العمل او بالمبالغة في الحجاب بدعوة الخوف عليها اوقات واوقات تانيه الخوف ع الرجالة من الفتنة

هما غالبا بينادوا بده -اياً كان سببه ومبرره -لانهم مرضى ومشوهين نفسيا بيداروا امراضهم الذكورية بلسان الحكمة والنصح والدين

ولو خرجت يظهرلها بقي نفس النوع اللى فات بس من غير أقنعة الدين والحكمة دول بقى اللى بيقفوا يعاكسوا ويتحرشوا بيهم مش بيعرفوا يداروا عدائهم تجاه المرأة والنوعية دي ظهرت جدا الفترة الاخيرة ... الاكيد انها موجوده من زمان لكن يمكن النت ومواقع التواصل بدأت تفضح ده اكتر بس الاكيد ان مش كل بنت تم التحرش بيها بأى شكل هتكلم في ده

ده غير النماذج اللي بتعادي اي واحدة ناجحة لمجرد انها متفوقه عليه او مميزه عنه يالهووووووي دول بقى لا هما بينصحوا ولا بيتحرشوا دول بقى لسانهم طويل شويه بأسلوب او الفاظ تهين وتحرق الدم

ده غير طبعا الاسر والاهالي اللي طول الوقت بيفرقوا في المعاملة بين الولد والبنت والصلاحيات اللي الاولاد بيحصلوا عليها طول عمرهم مقابل ان البنات اكتر كلمه تتقالهم عيب انتي بنت

ماتعاليش صوتك انتي بنت

ماتشتميش عيب انتي بنت

عايزة تخرجي عيب انتي بنت ..ولو خرجتي طول الوقت تليفونات

وماتتأخريش عشان انتي بنت

ماتسافريش لوحدك انتي بنت

عيب يبقالك زمايل ولاد ف الجامعة عشان  انتي بنت

وعيب ولد زميلك يتصل بيكي فى البيت عشان انتي بنت

كبت كبت كبت من كل الجهات 

انا شايفة ان كل اللي فات اسباب منطقية للطفح اللغوي اللي وصلنا ليه

   لما بنت تسمع خطبة رنانة من اللي مش شايفين منها غير انها عورة وسبب فساد وضياع الامة والكلام الكبير ده وماتطولش تشده من دقنه مثلا وتسحله ع الارض وتفقعله عنيه اللي مش شايفه منها غير كده حقها تشتم

ولما بنت واحد حيوان يتحرش بيها ف مواصلة عامه ولا في زحمة وماتقدرش انها تفضحه في الشارع وتجره من قفاه ع القسم عشان محدش هيقف معاه ويكلموها انها كده بتفضح نفسها كأنها راحت معاه شقة مفروشه مثلا حقها تشتم

ولما بنت اهلها يفضلوا اخواتها الاولاد عليها فى كل حاجة وتبتدي تكره انها بنت وتقرر تسترجل عشان تقلدهم او عشان تطمن اهلها انها مش مطمع وتقدر تروح وتيجي براحتها حقها تشتم

ولما نشوف الهم اللي احنا عايشينه كل يوم والاخبار السودا والشباب اللي دمه بيروح هدر والبنات اللى بتتهان وسفالة الداخلية واحنا في مكاننا ومافيش في ايدنا حاجة تتعمل يبقى بدل ما نتجنن او نطق حقنا نشتم

انا اول مره شتمت فيها ع الفيس لما شفت صورة خالد سعيد كان قلبي محروق بجد وبعد وقت هديت ورجعت يومين الثورة لما شفت صورة المتظاهريين وهما بيصلوا والامن بيرش عليهم ميه وبقالي كتير مش بشتم بس النهاردة لما شفت صورة محمد الجندي وقريت تفاصيل تعذيبه كان لازم اشتم

الاخوان كمان وعمايلهم الزرقة كائنات محفزة لطولة اللسان بصراحة 

واخيرا انا عارفة ان الشتيمة مش حل بس يمكن تفريغ للغضب او الكبت او قلة الحيلة و مش لازم طبعا معنى اننا بنكتب شتيمه لما نقرا حاجة تستفز مشاعرنا ان  ده العادي في حياتنا الطبيعية 

===========

طبعا البوست ده ممكن يكون صدمة لسماح وسلوي :)  بس انا عارفه انهم هيسمحوني ومش هيمسحوني من قايمة اصحابهم ع الفيس هما بس احتمال يخلوني ما اكتبش هنا تاني وساعتها بقى هروح على مدونتي اشتم فيها براحتي 

داين تدان

3سلامات يا مدونين 3 سلامات
بإيدى سلام .. وبعقلي سلام .. وبقلمى سلاااام

3 سلامات ل3 سنوات .. فآخر بوست كتبته نشر لي كان في 9/12/2009
وقبل ما اكتب شئ جديد مريت ع المواضيع القديمه
دا احنا كنا بنكتب كلام كتير أوى .. وبنكتب بالعاميه وآخر روقان :)

يالا عشان ما اطولش عليكم ندخل في الموضوع بقى
الحب ع النت .. والناس اللي بتتسلي بقلوب الناس
ناسين ان ربنا عدل .. والدنيا داين تدان
ونقول


ع النت كل شئ مباح

حتى القلوب

واللي ضميره في اجازه ارتاح

عامل دنجوان بيدوب

ع الفيس والميل سواح

والضحيه تقع بكلمتين يا دوب

بيدرس ضعفها

اللي مالهاش قريب

واللي فقدت قريب

واللي رماها حبيب

واللي بتنتقم من حبيب في حبيب

وبسرعه هو

يصنع بالكدب مفتاح

يفتح قلبها المحجوب

مش بقول ان الضحيه ملاك

لكنها ببساطه بتطلع من هلاك بهلاك

غلطانه هي وكل شئ محسوب

في النهايه في ربنا العالم بالقلوب

وكل واحد ونيته

داين تدان ..

وكل شئ مكتوب

-ـــــــــــــــــــــــــــــــــــــــــــــــــــــــــــــــــــــــــــــــــــــ
ملحوظه : لو بيحبك مش هيطلب تليفونك ولا مقابلات
لو عايزك مش هيطول في الكلام كتير
هيخبط ع الباب على طول
اللي بقى بيتلكك .. وبيختلق أعذار
يبقى بيتسلي كام يوم
وفي النهايه يقولك مع السلامه

لنتذكر جميعا قوله تعالي
( وَمَن يَتَّقِ اللَّهَ يَجْعَل لَّهُ مَخْرَجًا * وَيَرْزُقْهُ مِنْ حَيْثُ لا يَحْتَسِبُ )

اتقوا الله عشان ربنا يحفظ بيوتكم وبناتكم

سلوى

إمــرأة مضطـربة

تنظر لعقارب الساعة وهي تمضى في طريقها الدائري أمامها لا تتوقف أبداً وفي سعيها الدؤوب تشعر وكأن تلك العقارب تمحو حياتها رويداً رويداً ولكن بإصرار .. اصبحت تخاف من عقارب الساعة وهي تمر ويمر معها العمر وهي عاجزة تماماً عن إيقاف الزمان .

كانت تنمو كأجمل ما تكون الزهور فرحة جزلة تعرف أن الوقت مازال صديقاً لها . ليست مضطرة للإختيار الآن مازالت الحياة ترحب بوجودها وتفتح لها ذراعيها . الكل يحبها . الكل بجانبها .. 

انتبهت لدقات الساعة معلنة مرور الوقت ..نظرت في المرآة فوجدت شعيرات بيضاء تزحف بين خصلاتها الجميلة معلنة مرور الوقت أيضاً .. قد حان وقت الإختيار .. لم يعد الوقت لها صديقاً قد تخلى عنها بعد أن ساندها سنين وسنين 

نظرت لملامحها في المرآة فما وجدت الزهرة اليانعة فوجئت بأنها أمام إمرأة مضطربة خائفة لا تستطيع اتخاذ قرار .. لا تقوى على الاختيار .

لجأت لصديقاتها ولكن هيهات فمن كن يلجأن لها للمساعدة والمساندة لن يستطعن إسداء النصح لها الآن . الكل اتخذ قراراته واختياراته بمساعدتها فكيف تهدم ذاك الصرح بطلب المساعدة !! هن يشعرن أنها خدعتهن فهي لا تعرف الاختيار لا تعرف كيفية إتخاذ قرار. 

إمرأة مضطربة 

كان الحب يختار لها .. كانت لا تقع في بئر الحيرة .. فمع الحب ليس هناك إختيار مهما كانت العيوب والمميزات فسلطان القلب كان يحزم أمره ويختار نيابة عنها . ولكنها امرأة مضطربة قد كفرت بالحب . فكيف لها أن تختار ؟!

هناك من يمثل الحياة المريحة والواقع اليومي شخص كأي شخص قد ترتاح له وقد تمقته هي لا تعلم .هناك من يغمرها حباً وحناناً ويحيطها بكلمات الطمأنينة .. ولكنه حالم يبتعد عن الواقع كثيراً .. لماذا تخاف أن تقدم على تغيير منطقة الأمان التي ألفتها .. 

لماذا تتمسك بماضيها وذكرياتها الكل مضى في طريقه ونسج طريقا آخر لا يوصل إليها .

لماذا تتمسك هي بكل شئ ؟!.. كانت مع الحب تتمسك بكلمة واحدة وتنسى معها كل ما عداها .. الآن تتمسك بكل شئ وترفض كلمة الحب لا تثق بها لم تعد تؤمن بها .

تنظر في كل الإتجاهات ولا تختار طريق لتمشى فيه تشعر وكأنها تهرب في نفس الدائرة وعقارب الساعة تطاردها .. فماذا تفعل ؟ هل ستظل تدور في نفس الميناء بدون وصول حتى تتوقف عقارب الساعة وينتهي يومها في الحياة ؟!

عجباً لها من إمرأة هي بالفعل إمرأة مضطربة .. فهل لها من مساعدة قبل أن تغلق عليها كل الطرق وتسحقها عقارب الساعة ؟ . 

نعم إنها أنا .. إمرأة مضطربة 

سماح نصر 

ملحوظة : وجدت أن آخر بوست كتبته هنا من سنة تقريبا وهو أمر جد محزن فعقارب الساعة لم ترحمني ومرت سنة 

تحياتي لكل من يقرأني 

لحظة .. لحظة حب

بسم الله الرحمن الرحيم 

لحظات الحب في حياتنا قليلة جداً أحياناً تكون مفعمة بالفرح والسرور وأحياناً تملؤها الدموع والشجن .. من منا لم تمر بحياته لحظات حب .. من منا لم تحفر بداخل قلبه تلك اللحظات.. فكرت أن أعود لمدونتنا التي انسحبت منها منذ ثلاثة سنوات لأعود لها في لحظة حب .. للكلمة .. للمشاعر .. للتدوين .. لبعض أصدقائي في عالم التدوين لأشاركم لحظات حبي التي مرت في حياتي قد تأخذكم بعيداً عن مشاعركم الشخصية وأحوالكم البيتية لتعيشوا لحظات من حياتي ..

لحظات حبي لن تقتصر على حب الرجل والمرأة فصدقوني ليست شرطاً أن تكون أهم اللحظات هناك لحظات حب أخرى بالفعل حفرت في قلبي وعقلي ومازلت أتذكرها ... لا أندم على لحظة 

مرت بحياتي سواء سعيدة أو حزينة جداً فهذه اللحظات صنعت تلك الحياة .. دموع وابتسامات .

حبي مع الله

من أهم اللحظات في حياتي على الاطلاق كنت في حالة نفسية سيئة جداً وركبت تاكسي ووجدتني للحظة أشعر أني أحب الله جداً وأشعر برضا تام عن كل ما مر بحياتي من أحزان تعجبت لذاك الشعور وفهمت معنى كلمة قالها أحد الصالحين بأن الملوك لو عرفوا ما يشعرون به من الرضا لحاربوهم عليه بالسيوف .. حالة ترفعك عن الدنيا وتسمو بروحك بشكل غير موصوف .. للأسف لم أشعر بها كثيرا بعد ذلك ولكني دائماً أسعى لأسترجع تلك اللحظة وأعرف أن هذا الشعور موجود.

حب الجامعة

طبعا أحلى حب وأقوى مشاعر .. تغيبت عنه يومين ولم يكن بيننا اي تصارح نهائي بأن هناك حب بيننا وجئت على غير موعد ووجدت شلتي الكبيرة مجتمعة في حلقة كبيرة عند مكاننا بجانب كشك الكتب بساحة كلية التجارة ووجدته يرجع خطوة للوراء خارجا عن حدود الدائرة ويقول وبدون صوت .. وحشتيني .. قرأت قلبه قبل حركة شفتيه وكانت من أسعد لحظات حياتي :) 

لاحظوا أن المرأة تكون أجمل نساء العالم عندما تحب وعلى قدر حبها يكون توهج محياها وبريق عيناها

حب رحمي

من أقوى العلاقات على وجه الأرض صلة الرحم وأجدها أقوى من أي صلة أخرى فهي لا تنفصم حتى بالموت.

 كنت عند خالتي وفي حالة اكتئاب شديد ناتج عن قصة حب فاشلة أودت بثباتي الروحي .. فحاولوا الترويح عني بالذهاب "جديلة " تقريبا لنأكل بليلة وفي الطريق جاء صوت تامر حسني عبر المذياع بأغنية

" حبيبي وإنت بعيد .. مشتاق للمسة إيد .. من غير ولا همسة ..قرب ومد إيديك من غير ما أفكر فيك حتحس باللمسة .. بتقول لوحدك آه .. وبقول لوحدي آه وبتتسمع واحدة .. تبكي عليا عنيك .. تبكي عنيا عليك .. هي دموع واحدة "

أبحرت مع الكلمات ومع أحزاني ووجدت الدموع بغير إرادة مني تنساب كماء جدول صاف يعلن عن مدى نقاء هذا الحب ولوعة فراقه .. وهالني لحظتها بكاء ابنة خالتي الشديد وهي تنظر حانية إلىّ وسألتها وما يبكيك وأنا أعلم أنها في أيام خطوبتها الأولى  فقالت :  تبكيني دموعك أنت فإن بكيت عيونك بكي لها قلبي .. نعم أحب ابنة خالتي لأنها أحبتني بهذا القدر تلك لحظة لا أنساها .. سبحان من اعلى من قدر تلك الصلة فهي رحم من الرحمة بيننا

حب الصداقة

كنت ذاهبة مع صديقتي الحبيبة الى امتحان آخر السنة بالجامعة وفجأة جاء كلب وأنا عندي فوبيا من الكلاب وأخذ ينبح فخفت وتراجعت وكان الكلب يسد علينا الطريق وهي تبكي وتستحثني للمضي فالوقت يمر وسيضيع منا الامتحان وانا اقول لها أن تذهب هى وسأعود للمنزل ولكنها لم تستطع أن تتركني وفي نفس الوقت تبكي من أجل الامتحان ... لا تقلقوا :) جاء رجل بالجلباب وشخط فيا بعنف أني سأضيع زميلتي وأنه من العبث الخوف لتلك الدرجة فمضيت إحراجا من صراخه في ورفقاً بصديقتي .... شعرت كم أحبتني صديقتي لدرجة أن تضحي بمصلحتها من أجلي .. ودائما أتذكرها في حديث سبعة يظلهم الله يوم لا ظل إلا ظله " رجلان تحابا في الله اجتمعا عليه وتفرقا عليه " أعتقد الكلام ينسحب على الاناث ايضاً

حب الغريب

من الغريب أن تحب شخصاً غريبا عنك أليس كذلك فكيف تحب من لا تعرف ؟ ولكني أحب شخصيات غريبة بالفعل مرة ركبت مسافرة وركبت بجانبي امرأة صغيرة وطلبت مني أن أدعو لها " ربنا يفك كربك يا حنان " لم أعرف المرأة ولا ما هو الكرب في حياتها ومرت أعوام عديدة ومازلت حينما أتذكرها أقول ربنا يفك كربك يا حنان ..

حب الأماكن

أنا أعلم تماما معني كلمة رجل قلبه معلق بالمساجد فأنا أحب المساجد بشكل غريب خاصة مسجد أحمد بن طولون وأحب القلعة بالاسكندرية بشكل مبالغ فيه وأحب مسجدي .. المسجد الأقصى وأعلم يقيناً من شدة حبي له أن الله يوماً سيرزقني شهادة على أعتابه من أجمل اللحظات ولو أنها لم تكن في الحياة الواقعية بل في منامي عندما رأيت قبة الصخرة أمامي احساس .. إحساس وكأن قلبك يملؤه الضياء .

حب ناضج

عندما تمر السنين وتزداد نضجاً يكون الحب أقوى وأعمق يتخطى الكلمات وحتى الأفعال ويظهر في تشكيل الروح ثباتها .. جنونها .. حزنها

أحببت في فترة من الفترات في عملي وكنت أنتظر مجيئه فهو في فرع آخر وكان هناك أحد المهندسين يعلم بتلك القصة وقد كنت جزلة وفرحة بشكل كبير لأني سأراه فوجدت ذاك المهندس يقول لي .. اهدئي قليلاً وإنزلي على الأرض انت طايرة في السما علمت وقتها كم أحبه ..

وعند وقت الرحيل وفي آخر يوم رأيته فيه كنت أخرج من مكتبه مودعة اياه كبقية الزملاء وكانت يدي تأبى علىّ أن أغلق الباب وتضيق المساحة التي أراه منها وهو يتمسك بكلتا يديه بكرسيه لكي يقوى على احتمال اللحظة .. بعدها لم تقو عيناي على احتمال انهار الدموع التي سكبتها .. وذهبت لعلاجها .

حب الأيام

والدتي خضعت لعملية قريباً وحدثت مضاعفات وكانت تتألم ليلاً وليس بمقدوري عمل شئ وانتابني الهاجس بأنه قد يحدث لها سوء وغلبني النوم من شدة الارهاق ومع ذلك ظل لساني يردد اللهم أسألك بحق " وإذا مرضت فهو يشفين " أن تشفي أمي .. اللهم بحق اسمك الشافي .. حتىوجدتها توقظني لأخفض صوتي قليلا بالدعاء وهو يسري بجوف الليل من شدة خوفي كنت أدعو بصوت عال وأنا نائمة .. ليس حبي لأمي ولكنه حبي لأيامنا معاً فهي قطعة مني تتألم وتتألم لها روحي بالتبعية .

 لم يكن الحب لنشقى به أو لنسعد به ولكن لتتكون شخصيتنا عبر تلك الخبرات .. فلا تحزن على حب آلمك فقد شكل جزء منك ولا تبتعد عن حب قد يؤلمك فعلى الأقل ستتذوق طعم لحظة حب مرة أخرى وما أقلها من لحظات وما أندرها فلا تلق بجواهر أرسلها الله لك . 

قدر تلك اللحظات في حياتك فقد لا تتكرر .

نهاية حباً في عالم التدوين كتبت ورغبة مني في إحياء عالم التدوين من جديد لأنه أضاف لنا الكثير عدت كانت كلام بنات وأصبحت هي أنا ..

 تلك كلماتي .. وكلماتي هي أنا

تحياتي

سماح نصر

للغائبتان الحاضرتان .. عيدكم سعيد

L.G & سلوي

كل سنة وانتم طيبين وبخير دايما 

كنت عايزه أقولكم انكم وحشتوني جدا

وربنا يجعل عيدكم سعيد وجميل زي قلوبكم

خلونا ما نبطلش نحلم

واحنا صغيرين بيتولد جوانا احلام صغيرة جدا وبريئة جدا جايز مش بتكون مهمة لغيرنا وبيشوفوا انها تافهه او ساذجة بس بالنسبة لينا بتفضل كنزنا اللى بنحلم دايما نوصله وتعدي السنين ونكبر حبة والاحلام الصغيرة يا اما بتتحقق ومعاها بيتحقق جزء من سعادتنا يا اما بتتدراى جوانا من كم السلبيات والمعوقات اللى بتقف قدام تحقيقها بتستخبى فى ركن فى روحنا كأنها ذكرى بعيدة لما نفتكرها نبتسم بألم ليها لان احنا فى يوم كنا متخيلين ان سعادتنا وحياتنا متوقفين عليها ونكبر اكتر وتزيد احلامنا وتكبر امالنا وتوسع حياتنا وتتزحم بتفاصيل اكتر واكتر ولكل تفصيلة حلم خاص بيها وبيمر الوقت واحنا مشغولين وبنجرى فى الدنيا هنا وهناك وبرضه مع الوقت نلاقى الاحلام اللي مدارية فى ركن الروح بتزيد و بتوجع كل لما نبقى لوحدينا مع روحنا نطلعهم نتفرج عليهم ونحس بحسرة عليها ونحس كمان ان العمر بيعدي وان كل رصيدنا من الحياة شوية احلام مدارية فى ركن ضلمة من روحنا

اللى فات ده بيحصل كتير جدا معظمنا مر بيه لان الاحلام اوقات كتير بتكون جنتنا على الارض الجنة اللى بنهرب ليها من وجع الايام وقسوة الدنيا اوقات عشان كده احلامنا بتكون كتيرة جدا وساعات بعيدة او مش منطقية لانها احنا بنختارها ملهاش دعوة بالواقع وحتى لو ليها علاقة بالواقع وفى امكانية انها تتحقق فعلا مش بنكون احنا المتحكم الاول والاخير فيها فى الاهل والمجمتع وما يسمى بالعادات والتقاليد وطبعا ده بيكون واضح جدا مع البنات اكتر -لمجرد انهم بنات- فى كمان حاجة مهمة بتكون عائق فى تحقيق احلامنا احنا نفسنا اوقات مش بنكون مستعدين ان احنا نقوم بدرونا فى حلمنا ومش بنحاول نسعى للاستعداد ده او كمان اوقات بنخاف خصوصا لما نلاقى كل اللى حوالينا معارضين لحلمنا بنخاف نشيل مسئولية الحلم بتاعنا لان احنا مش واثقين هو هيودينا على فين ومش عندنا استعداد نتحمل نتيجته لوحدنا لان بنكون عارفين ان احنا بنعمل شئ مختلف وان الناس شايفه انه مش عادى بنخاف من النقد السلبي بنخاف من السخرية
كل ده بيتراكم جوانا خلال السنين لان غالبا اكتر حاجة اهلنا بيورثوها لينا بشكل تلقائى هو الخوف فبنفضل الحلم وبس على ان احنا ناخد اى خطوة جادة فى تحقيقة ونرجع نقول احلامنا مش بتتحقق ونكره احلامنا هى كمان

انا ده عدى عليا فى وقت ما وحسيته جدا جايز لانى قضيت وقت كبير بحلم وبس ولان ماكنتش جرئية بالشكل الكاف اللى يخلينى اسعى لتغير الواقع من حواليا فى وقت ما واكيد الاحساس بالفشل كان ملازمنى طول الفترة دى بس اعتقد انه مع الوقت فهمت حاجة مهمة جدا وبدأت اتصرف على اساسها عرفت ان المشكلة ماكنتش فى المجمتع والواقع اللى حواليا وبس انا كمان خفت وده خلانى اغير احلامي مش سهل ان احنا بعد ما عشنا سنين كاملة نحلم بطريق معين احنا شايفينه وردي ومتخيلين انه منتهى سعادتنا بعد كل ده نصرف نظر عنه بس برضه مش منطقى ان لما نكتشف انه مش هنقدر نمشى فيه ان احنا نفضل مصممين على انه يكون حلمنا
ليه مندورش على احلام تانيه نقدر نحققها من خلال الواقع اللى بدأنا مع الوقت نكتشف ابعاده وقدرنا نقيم قدراتنا لاننا كبرنا وبقينا انضج من الاول وفهمنا نفسنا اكتر واتعلمنا وخدنا خبرة ليه منستغلش كل ده بإننا نخلق لينا حياة جديدة فيها تفاصيل نحبها وتحبنا ندور على احلام تبقى شبهنا بجد نقدر من خلالها نعلن عن وجودنا بشكل منطقى وحقيقي مش لازم تكون احلام كبيرة جدا بس المهم انها تكون شبهنا جدا وحسينها جدا عشان نقدر نحققها فعلا وعشان نفضل باقين عليها وساعيين ان احنا نحولها لواقع اجمل من اللى احنا عايشينه بندور فيه فى ساقية فشلنا
خلونا مانبطلش نحلم ونغير حياتنا بتفاصيل صغيرة ونجمل واقعنا بأحلامنا اللى شبهنا
-----------------------------------------------------------------
ولكل البنات :)) L.G التدوينة اهداء ل

رحـيــــــل

رحله مع الطبيعه

إنا لله وإنا إليه راجعون

الحمد لله .. ولا حول ولا قوة إلا بالله ... ولا راد لقضاء الله
رجاءا من كل من يدخل هذه المدونه .. او قرأ حرف فيها
رجاءا .. قراءه الفاتحه وفضلا منكم سورة يس أو ما تيسر من القرآن الكريم
لروح أمي الغاليه حبيبتي وصديقتي .. وأن تدعوا لها بالرحمه والمغفره
جزاكم الله بكل حرف كل الخير

لله ما اعطى ولله ما أخذ

ثق في نفسك

ما مقدار ثقتك بنفسك ؟
هل تحب نفسك ؟
هل تقدرها ؟
لا أتحدث عن الغرور او الأنانيه
فقط اسأل ما مقدار نفسك عندك ؟
وحدك من يستطيع ان يجيب
ولو لم تكن تعلم فدعني اساعدك
مرآتك الناس حولك
أهل .. صديق ... زميل .. زوج .. حبيب .. إلخ
كيف يعاملوك ؟
أنت وحدك تستطيع أن تجيب
وقتها ستعرف هل تحب نفسك أم لا
لو كنت تحبها وتقدرها فلن تسمح لأي إهانه أو سوء تقدير من أي شخص مهما كان
تذكر معي دوما
إذا المرأ هان على نفسه لكان على غيرة اهونا
فلا تدع أحد يقنعك أنك لا تستحق إلا ما رماه لك من قليل العطف والإهتمام والإحترام
كن واثق أنك تستحق أكثر
ومن لا يمنحك الأكثر
فلا يستحق أن تمنحه شئ .. اللهم الا ما قد تمنحه لأي انسان يحتاج إليك

والآن دور القلب
هل تعتني بقلبك جيدا ؟؟
هل أنت حريص عليه ؟؟
هل تحميه ؟؟
هل تحبه ؟
إذا إياك أن تمنحه لمن لا يقدرة أو يستحقه .. وإذا فعلت وجاءك مجروح
فإياك أن تعاقبه .. فقط حاول أن تحميه اكثر .. وتعلم أن لا تضعه في قارب يغرقه
قالت لي صديقتي .. إن القلب كالطفل .. يلهو ويمرح ..
ونحن لا نستطيع ان نمنع طفل من أن يلهو ويمرح فقط نحميه
فإذا ما سقط وجرح نفسه
فلا نعاقبه
فهو طفل لا يفقه شئ
فقط نحتويه ونحميه اكثر
وأزيد انا
أن نحبه اكثر ونقدرة كما يليق به
وكل واحد أعلم بقلبه وما يستحقه
والآن أسأل
هل تثق في الله ؟
إذا ثق انه يحبك وكرمك ويريد ان تكون اقوى وافضل لتكن عبده بحق
فلا تسئ لنفسك وتمتهنها وتكسوها ضعفا وذل

والآن
قيم وضعك من جديد ... حاول أن تكون انسان اكثر ثقه واكثر حبا لنفسه

كل سنة واحنا هنا

سلوى , L.G

كل سنة وانتوا طيبين وبخير دايما
كل سنة والناس اللى بتزورنا كلهم طيبين
واللى مش بيزرونا برضه يالا مش مهم عشان العيد وكده

انا قولت اعيد على المدونة اللى بقت شبه مهجوورة
اصلها جاتلى فى الحلم امبارح وفضلت تعيط تعيط تعيط
وتقولى بكره العيد يارحيل هتفتكرونى ولا هتفضلوا ناسينى
قولتها هحاول هحاول يمكن سلوى وال جى قلبهم يرق ويحن عليكى هبلغهم سلامك وعتابك
وما على الرسول الا البلاغ
اللهم بلغت اللهم فا شهد
انا ماشية بقى قبل ما حد منهم يجي ويطير ورايا
يخلعونى من هنا ويبلغوا عنى السرايا الصفرا
ههههههههههه
عيد سعيد عليكم جميعا
اه صحيح نسيت اقولكم مش عايزه خناق على الهدايا اللى فالصورة
اى نعم شكلهم مغري بس احنا مش اطفال
اعقلوا وتروى منك لها انا هفتحهم وابقى ابلغكم باللى فيها
اه بلطجة بقى مش انا اللى جايبة الصورة؟

حيرة

وبعيدا عن افلام الخيال العلمي اللى بكلم فيها بقالي فترة وبعيدا عن احلام اليقظة اللى بنفوق منها على كوابيس الواقع نرجع شوية للواقع بس من غير كوابيس كفاية الكوابيس الليلية ونرجع للى المفروض انه يحصل رغم انى بكره كل ماهو مفروض وتقليدي
وبحبة منطق وبشوية عقل بس طبعا مش عقلي لان اساسا انا الحبة اللى كانو فاضلين عندى طاروا من زمان
هحاول افكر بشكل مختلف رغم يقيني اني مش هوصل للي يرضينى لكن وماله لعل وعسى ويمكن وجايز وميضرش برضه رغم انى عارفه اخر الحدوتة

من اول مبدأت اكتب هنا مع سلوى وإل جى وانا بفكر اتكلم عن جواز الصالونات ومن غير هجوم ولا انفعال ومعارضة حبيت اطرح الموضوع من خلال تساؤل هنوصله فى الاخر

لاقتنى بقولها فى حوار ساخن حائر ملوش مينا
هو احنا لما نحب حد نحبه عشان مفروض علينا نحبه ولا اصلا الحب هو اللى بيفرض نفسه علينا ؟
ردت وقالت بنحب الشخص لصفات جميلة فيه حنيته وطيبته حبه لينا
قولتلها ممكن منحبوش ولا نكره بس يكون عادي
قالتلى المهم الاستعداد للحب وللتغير والاستقرار من جوانا
قولتلها لازم يكون فى حب عشان يحصل التغير
قالتلى الحب بيجي بعد كده؟
طيب لو الحب مجاش بعد كده وفضل الاحساس انه عادي؟؟؟؟
سكتت شويه وقالت يبقى منكملش

وافتكرت حوار تانى كان بينى وبين واحده صاحبتي كنت بزورها لاقيتها جايبة ورقه وقلم وعامله حاجة اسمها تحليل سوت هو عبارة عن تحليل بيتعمل لما تكون قدام قرار ومحتار فيه بنكتب فيه نقاط القوة والضعف والفرص والمهددات كتبت هى طبعا المميزات اللى شافتها فى العريس اللى كان متقدم ليها والعيوب والظروف الخارجية اللى ممكن تهدد حياتهم او ممكن تكون فرصة ليهم وبتقارن وعمالة بتشرحلى وانا عندى زهووول مسكت الورقه وقولتها يابنتى اى حاجه تتحسب بالورقة والقلم الا الجوااااااااااااااااااز كونك توافقى او ترفضى ده راجع لانطباعك الشخصى و مشاعرك ناحيته مش ماسكه ورقه وقلم وبتحسبيها

طبعا هى لو كانت بتحبه عمرها ما كانت هتفكر كده لان اصلا هيكون فى استعداد انها تضحي وانها تتغاضى عن اى عيوب وتعرف كويس تتعايش معاها وهتكون على اتم استعداد انها تواجه اى تحديات معاه وده بيكون عيب فى جواز الصالونات ان اصلا بيكون الحد ده مش مهم قوي وبالتالي لما يحصل اى موقف حتى لو صغير مش بينفع نفوته لان اصلا مفيش دافع للاستمرار

حاسه انه بيكون فى فجوة بين الطرفين فى حالة انه جواز تقليدي لان محدش فيهم عرف التاني فى موقف وحياه قد ماعرفوا من كلام متزوق عشان الموقف اللى جمعهم
مش تعارف طبيعى وتلقائى يكون كل حد فيهم على راحته ومن غير ما المفروض انهم يحبوا بعض وان يكون ده شغلهم الشاغل وتكون المواقف مفتعلة لتحسين العلاقات او لانهم يقنعوا بعض انهم بيحبوا بعض

يعنى الصح ان الحب يتولد لوحده جوانا من غير منحس بيه يتسرسب فى روحنا فجأة نلاقى نفسنا حبينا
ولا نعيش نفسنا وهم الحب ونقنع نفسنا بيه واحنا اللى نخلقه بينا هيكون زى الطفل اليتيم اللى قررنا ان احنا نتبناه وبنحاول دايما انه ميحسش بغربة بينا وانه مننا ونيجى فى يوم غصب عننا نفتكر انه مش ابننا هنجرح نفسنا ونجرحه بس هيكون فات الوقت وكان م البداية الصح ان احنا نسيبه لحد ما يتولد لينا ابن من روحنا ساعتها لانه هيكون وليدنا مش هيهون علينا نجرحه فى يوم ولا نجرح نفسنا ؟؟؟

مش عارفة بجد بس عارفة انها بتختلف من شخصية للتانية ممكن ناس يناسبها جدا الزواج التقليدى وتنجح فيه وناس تانيه بيكون صعب عليها التكيف مع اى حد نفسيااات بقى نعمل ايه ههههههههه لالالالالا مش انا طبعا ده انا عاقلة جدا خالص اخر حاجة
------------------------------------------------------------------
هسافر تلات ايام كده اشوفكم لما ارجع ان شاء الله
ههههه باين كده والله اعلم انا خدت المدونة لحسابى ومن هنا ومن مكاني بنادى بعلو صوتي على سلوى وال جي المره جاية مستنية حد غيرى يكتب انتو لو سيبتونى كده الناس هتطفش م المدونة مانتو عارفين اللى فيها حد عاقل يكتب بقى كفاية جنان ع الناس

مرآتي

ونكمل سلسلة الخيال العملي اللى بدأنا فيها

كان فى موضوع شاغلني من فترة تقريبا كان من اخر عريس تفضلت وتكرمت وتعطفت وواقفت انى اقابله نيهاهاهاهاهاهاهاهاهاها وطبعا طفشته كالعادة

المهم كنت كل لما اقول لحد ان سبب الرفض رغم انه حد كويس انى حسيت ان ميولنا وتفكيرنا مش واحد وان فى اختلاف فى اهتماماتنا يبصلي بتعجب وكأني يعنى بقول كلام غريب مريب ويبقى على طرف لسانه يقولى انتى هبلة يابت؟ و اوقات بتتقال طبعا لان فى ناس مش بتخلى فى نفسها حاجة ودول قريب انا هقطع علاقتي بيهم فكل واحد يخلي باله من كلامه معايا بعد كده هههههههه

وكان فى ناس شايفه انه ايه المشكله ان تفكيرنا وميولنا مش واحده طالما حد كويس يعنى هو حد لاقي عرسان ؟ وبعدين ميول وايه وتفكير ايه اللى انا بقول عليه؟ ايه الكلام الفاضي اللى بقوله ده ؟ اهو عريس كويس وفى الاول والاخر المهم ان يكونلى بيت واسرة واطفال واعيش وخلاص مكل الناس عايشة والبنات بتجوز من غير ما تفكر فى الكلام الفاضى اللى انا بقوله ده

وناس تانيه كانت شايفه ان اصلا بعد الجواز مش بيكون فى وقت لموضوع الاهتمامات والهويات او ان حتى يكون فى فرصة انى اعمل حاجه انا بحبها لوحدي عشان اصلا يبقى فى وقت انى اعمل معاه حاجه مشتركه بينا بنحبها احنا الاتنين طالما اتجوزت خلاص بقى فكني من الحورات بتاعة البنات الفاضين اللى انا بفكر فيها

واراء اخرى كانت بتقول ان بالعكس التشابه فى الميول والاهتمامات بيولد الملل بين الزوجين وان لما يكون فى اختلاف بينهم ده ظاهرة صحية عشان التجديد على أساس ان كل حد يكون فى وادي مع نفسه ههههه حتي منعا للمشاكل والخلافات الناتجة عن الحوار المشترك واهو كله مصلحة وكده يبقى فله على الأخر

وانا بكلم مع سلوى من شويه قالتلى لازم يكون فى حد ادني من التفاهم والتشابه ولما قولتلها ان المفروض الزوجين بيكونو مرايات بعض وانهم انعكاس لبعض وانى شايفة ان التشابة لازم يكون حد اقصى مش حد ادنى عشان يقدروا يتحملوا انهم يقضوا سنين عمرهم سوا على الحلوه والمرة ردت رد منطقى وواقعي جدا مفيش حد تؤم حد

ولاني عايزه حد تفصيل ولان البوست ده خيال علمي زى ماحنا متفقين مقتنعتش لان مقتنعه بحاجة واحده ان التشابة والتؤام بين اى اتنين هيرتبطوا امر ضرورى جدا كلامهم تصرفاتهم اتجاهتهم هوايتهم تفكيرهم خصوصا لما يكون زواج تقليدي يعنى اصلا مفيش بينهم حب يدوب كل العوائق والصعوبات اللى ممكن تقابلهم واللى ممكن تكون ناتجة عن اختلافات فى التفكير

من هو الرجل الذي لا تنساه المرأة

يمرّ على الإنسان أشخاصٌ عديدة إلا أن فئةً خاصّة من هؤلاء الأشخاص تبقى عالقةً في الذهن. فربما يتذكر الرجل فتاةً قابلها منذ فترة طويلة، ولم ينجح الزمن في إزالتها من ذاكرته، لجمالها الخارق، لتميزها الجذاب، لكلامها العذب، لابتسامتها الرقيقة، وربما لشخصيتها الفكاهية الضحوكة، وكذلك الأمر بالنسبة للمرأة فهي لا تنسى بعض الرجال الذين تقابلهم فتش عن الرجل الذي لن تنساه المراة؟؟ هو
1- الرجل الذي يكون كريم في عواطفه ويده ويهبها الأمان والحنان
2 - اللين في تعامله الرقيق في مشاعره، القوي الشخصية بلا غرور الواثق من نفسه
3 - الذي تشعر وهي معه برجولته وأنوثتها.
4 - إذا تحدث تنبهر من أسلوبه وحسن حديثه ولا تمله.
5 - الذي يدللها ويرويها عشقاً.
6 - الذي يتقن فن النظرات تجاهها.
7 - الذي يقدر إحساسها ومشاعرها ويحن عليها وقت حزنها وألمها.
8 - الذي يستمع لها، يقدر رأيها، يطلب مشاركتها ويحترم رأيها.
10 - الذي يفضلها على نفسه، في بعض الأمور.
11 - الذي إذا كانت أخطائها بسيطة يسامح ويعفو عنها.
12- الذي يكون غيور عليها بدون تحكم أو تسلط.
13 - الذي يحتمل تقلب مزاجها ويشاطرها المزاح والضحك.
14 - الذي يفرح أذا فرحت ويحزن أذا حزنت ويقف معها سندًا لها.
15- الذي تشعر انه يحتاجها في كل لحظة.
16- الذي يفتخر بها ويراها في عينه غالية جوهره ثمينة.
17- الذي تهبه عمرها لثقتها به وتعتمد عليه.
18- الحار في عواطفه الذي تشعر معه دوماً أنه لا يرى غيرها.
19- الذي يكشف لها أسراره ويشركها في همومه.
20- الذي ترى دموعه ولا يخفيها عنها.
21- الذي يشعرها أنها ملكت فؤاده وعقله.
22- الذي يطرب مسمعها بكلمات دافئة مليئة بالحب و الغزل

لحد هنا الكلام ده منقول من هنا
----------------------------

طبعا مش محتاجبن اقولكم ان الكلام ده بقى هو اللى خيال علمى بجد لان اصلا ملوش وجود فى حياتنا ولان اصلا مشاعر كتير بقت مزيفة وان حتي لو فى بعض النقاط اللى فاتت مو جوده فاستحاله انها هتكون كلها متجمعه فى شخص واحد لان اكيد لو اى بنت او اى امرأه وجدت الصفات دى فى راجل بكل الصدق مش هتلحق ياعينى تتهني بيه لان هتكون ماتت اثر ازمه قلبيه حاده نتيجة ان اخيرا لقت راجل بالمواصفات دى ورفقا بكل النساء فالرجاله قرروا انهم مش يتحلوا بالصفات دى وانهم يطلعوا عين الستات عشان يضمنوا وجودهم فى الدنيا هههههههههههههه

حلم امرأة

عندما قرأت كلماتها الرقيقة اثارت بداخلي الكثير من المشاعر وودت لو كتبت فى صفحة تعليقها الكثير والكثير لكنني أحسست أن تلك الكلمات مكانها هنا فى مدونة انها انا لانها كلمات تخصنا جميعا
كتبت تقول فى قصتها

(أمنت منذ نعومة أظافرها بأن جمال الأنثى فى عقلها وذكائها وتفكيرها ولم تكن جميلة بقدر ما يكفى لتتخلى عن هذا المنطق) منقول من مدونة درما لخلود صلاح
واثارت بداخلي تساؤلات كثيرة حول ماهية الاشياء التى قد تجعل من أى أنثى سعيدة وهل تكمن حقا بعض السعادة فى كونها جميلة بعض الشئ ؟ او انها ذكية ؟ او انها ناجحة فى عملها ؟او كونها فتاه محبوبة من الجميع ؟او كونها حققت طموح كانت تبغاه طريقا لها؟
فكم من امراة جميلة تعانى وحدة او قسوة مجتمع يحملها مسئولية انحراف كل شاب او مضايقات لاتنتهى, وكم من امرأة ناجحة فى عملها وتعانى ايضا وحدة وقسوة مجتمع ينظر اليها على انها فتاة ذات طابع خاص فتقيم حسب طبيعة عملها ونجاحها, وكم من امراه طموحة وجدت نفسها وحيدة بعد صراع مع الايام لتحقيق ذاتها, وكم من امرأه ذكية ظنت انه بذكائها تستطيع ان تملك زمام امورها فأتت الاقدار عكس ما خططت فانهارت احلامها, وكم من امرأه محبوبة من الجميع لكنها تفتقد لوجود رجلا من اجلها وحدها بجانبها
لا اعلم لماذا حين سرحت كثيرا فى امور الكثير منا كفتيات اختلفنا في البيئة والدراسة والعمل وتفاوتت بيننا الاعمار الا اننى حين فكرت لم اجد ان هناك ما قد يجعل المراة سعيده حقا مستقرة امنة سوى وجود زوج يفهمها بعمق يقرأ ما في عيناها من حوار يسمعها فى صمتها يمنحها دفئا وحنانا فلا تحتاج لأحد غيره فيكون وحده هو كل دنيتها قادر أن يحتوى كل أحزانها وحده لديه القدره ان يهدئ من حيرتها ويطمئنها تجد فى حضنه ملاذا حين تهرب منها دمعاتها حين تقسو الايام فيكفيها انها معه وانه يحمل عنها اعباء الحياة
رجلا بكل ماتحمله الكلمة من معانى تشعر معه المرأة انه وطنها الوحيد
ذلك فقط ما تحتاجة اى امرأة لتبقى سعيدة

وفى النهاية تذكرت بيت شعر نردده دائما

ليس كل مايتمناه المرء يدركه و تجري الرياح بما لا تشتهى السفن

فقد تضطرنا الاقدار للسير فى طرق عكس التى حلمنا بها وتمنينا ليبقى كل شئ فى نهاية الامر قدر ومكتوب فى علم الغيب

ومن أول يناير هكون إنسان جديد

ب
كل يوم مشاكل مشاكل
حاجه تزهق ؤ انا زهقت خلاص
مكنتش دى خطوبه اللى تعمل فى الواحده كده
ح
إيه بس اللي حصل هو إنتي لحقتي
ب
كل يوم مشكله
على الخروج واصحابى
حتى النت بقى مشكله
والسفر
وعلاقاتى بقرايبي
ح
مجرد الخروج والأصحاب والنت مفيش فيهم مشكله المهم بنستعمله إزاي وفي إيه
ب
هو مش قادر يفهم ده
كام مره افهمه اقوله انى مش بعمل حاجه غلط
وانى بعمل احترام لوجوده فى حياتى
لما خلاص مش قادره أتحمل
ح
برضه هو عايز يحس بأمان
ب
يحس بامان ايه انتى محسسانى انى بخونه ولا بعمل حاجه غلط
ح
لا مش بتعملي حاجه غلط
بس إنتي كمان مش حاسه بأمان
إنت بتدوري على طريق تمشي فيه .. مكان ترتاحي فيه .. وعماله تخبطي هنا وهناك
ب
هو مش فاهم ده
ح
ولا الخروج ولا السفر ولا الأصحاب حققوا لك ده
ب
كل اللى بيفكر فيه ازاى يتحكم فيه وبس
كل حاجه غلط وميصحش وعيب انتى بنت
ح
شوفي يا ب العزيزه
في راجل ممكن يحب أوى ولو شاف زوجته بتغلط أدامه يغمض عنيه ويسامح علشان ما تبعدش

عنه .. بس ده حب مش سوى

وفي راجل يحب بس عايز يحس بأمان مع اللي إخترها ويحس إنها بتحترم رجولته
خطيبك ماقدرش أقول إنه غلط
لكنه ببساطه مافهمكيش
ماعرفش البياض اللي جواكي
ب
لأ هو لو كان حبنى كان اكيد فهم
ح
مش عارفه حبك ولا لأ
اللي أعرفه إنه خاف
لو كان فهمك صح وعرف إنك نقيه وإن تصرفاتك دي نتيجه لتوهان نفسك وحاجتك للإستقرار
كان صبر وكان وقف معاكي
وكنتي من نفسك هتقللي من التصرفات دي
لأنك ببساطه هتكوني وقتها لقيتي الأمان والمرسي اللي كنتي بتدوري عليها

أي راجل في الدنيا لو فهم إن أي بنت ممكن تعمل اللي هي عايزاه وممكن تغلط ومفيش مخلوق

يعرف .. وكمان تفضل أدام الناس ملاك
كان قدر يفهم إن ما يحكمش بالمظهر
ب
الثقه معدومه بينا
ح
لا مش مسأله ثقه
لكن خوف
وما أقدرش ألومه
ب
مهو الخوف عشان مفيش ثقه
لو كان واثق مكنش خاف
ثقه فى نفسه قبل ما يكون فيه
ح
لأ .. هو واثق في نفسه وواثق فيكي .. بس خاف من التصرفات دي لأنه ما فهمهاش ومافهمكيش
وبدل ما يتعب نفسه معاكي .. يروح ببساطه يخطب واحده جاهزة زي ما يحب
إنتي كمان ما تنتظريش إن كل الناس تفهم تصرفاتك صح
لأنها علشان تفهمها صح
لازم تعرفك أوى
وتعرف إنك بنت نقيه مش بتعمل شئ غلط
وما تنسيش إن رسولنا الكريم قال
صلى الله عليه وسلم" اجتنبوا مواطن الشبهات

ب
مهو انا للاسف تخيلت انه يعرفنى قوى
بس اكيد كان مجرد وهم
يعنى انا هعيش زى مالناس عايزه
كل حرف وكل كلمه وكل تصرف هعمل حساب الناس فيه

ح
لأ طبعا
لكن لازم يكون لك سقف .. حدود مش تعديها .. الحدود دي أهمها الدين
واسمحي لي أسألك
إنتي راضيه عن اللي إنتي فيه ؟
ب
مش مساله راضيه لا ولا لأ
بس
ممكن يكون فراغ
ح
ده مبرر يعني لتصرفاتك .. الفراغ
طالما بتبرريها يبقى مش مقتنعه بها
ب
مش بغلط صدقينى
ح

ده أنا متأكده منه .. وبرضه خدي بالك الغلط نسبي من مكان لمكان

ومن بيئه لبيئه

يعني في مكان ممكن البنت تسهر بره البيت ل10 مساء

وفي مكان البنت المغرب ما يأذنش وهي بره

المهم
السبب بقى سواء كان فراغ .. أو لسه مش لاقيه نفسك
أو بتدوري ع الأمان وهدوء النفس
الأسباب كتير لكن المهم إنك أكيد عايزة ترتاحي .. إنتي عامله زى حد بيجري لمسافات طويله من غير

راحه وأكيد نفسك ترتاحي
لو خطيبك فهم ده
وقدر يديكي ده
كنت هترجعي لنفسك
رغم إنك مش بتغلطي وأنا متأكده من ده
ب
هو حد كويس
بس مستعجل دايما
عايزني أتغير فى يوم وليله
ح
لو كان صبر وحس اللي جواكي
كنتي مش هتحسي إنك محتاجه كل الأصحاب دول ولا كل الخروجات دى ولا كل الغربه اللي بتتغربي فيها

وكنتي إكتفيتي بالأمان اللي هتحسيه معاه
ب
معاكى اكيد
بس تفتكرى كنت هستحمل حياتى بالشكل ده
من غير كل الناس
ح
إنتي بتدوري ع الناس علشان تتوهي بينهم
تنشغلي بيهم
تتوهي في مشاكلهم وتنسي نفسك
أنا مش بقولك إنعزلي عن الناس
لكن كل شئ بقدر
لا إفراط ولا تفريط
إحنا عايشين كلنا بين الناس
لكن كل شئ بحدود
ب
لما بيعمل كده الوقتى اومال بعد كده هيعمل ايه
ح
هو مش القضيه
لأنه ببساطه ما عرفكيش صح
إنتي القضيه
جايز لمروره في حياتك حكمه
وهي إنك تعرفي إيه محتاج تغيير في حياتك وإيه مش محتاج
مش لازم دايما نتغير علشان حد
المهم نتغير علشان نفسنا
علشان لما نحط راسنا ع المخده نحس براحه مش قلق
إنت حد كويس من جوه
ولازم ده يظهر بره كمان مش علشان حد
لكن لأنك تستاهلي ده
وجديره به
ب

عارفه ان كلامك صح
ناس كتير بتنتقد أفعالي وتصرفاتي خروجى وسفرى الكتير طموحى واحلامى بحجه انى بنت

رغم انهم شايفين انى حد كويس والحمد لله كلهم بيحترمونى مش عارفه هو التناقض فى مين
ح
عزيزتي
لأنك بنت ..فأنت شئ غالي .. إنت قاروره .. الإسلام كرمها وحافظ عليها .. ولازم تحافظي على

الصورة الجميله دي ..
لازم تهدي شويه .. بلاش تنطيط وتوهه بين الناس .. ده مش حل .. الحل إنك تواجهى وتكوني إنسان

جديد .. وفرصه أدينا في يناير على رأي شعبوله ..:)

ب

انا فعلا حاسه انى محتاجه اتغير واستقر

وابدأ صفحة جديدة فى حياتى تعبت من التنطيط والخروج

بس اهو الواحد بيلهي نفسه فى وسط الزحمه بيتوه فيهم

جايز بس كنت دايما محتاجة لحد يكون سبب فى ده عشان استغنى بيه عن اى حد

بس من الواضح ان كلامك صح لازم الواحد لما يتغير يتغير عشان نفسه مش عشان حد

محتاجه لوقفة اكيد .... ما علينا
قوليلى بقى انتى خطوبتك باظت ليه
مع إنك قافله على نفسك ولا أصحاب ولا خروجات
ح
لااااااا أنا شئ تاني بقى
ونكمل المرة الجايه بقى
بس ياريت نكون لسه في يناير علشان ألحق أكون إنسان جديد
:)

ملحوظه : ده حوار عن بنتين ممكن يكونوا موجودين في أي مكان

مش بالضرورة نكون إحنا يعني :)

لكن حبينا نعرض نموزجين لبنات موجودين بينا

هذا للعلم وشكرا وياريت كل واحد يقف مع نفسه واقفه كده

:)

ويشوف في إيه محتاج إنه يغيره في نفسه ليكون إنسان أفضل