الله يحرقهم بجاز وسخ ولاد الجزمة
ده كان تعليقي بعد ما اتفرجت على فيديو ياسمين البرماوي وهي بتحكي ازاى تم التحرش بيها ومحاولة اغتصابها فى التحرير وسحلها وضربها ورفعها على عربية لمدة سبعين دقيقة من الاهانة والوقاحة والسفالة
واللي يغيظ اكتر بقى لما تلاقى حيوان يقولك ماهى غلطانة اللى نزلها مظاهرات تستاهل
اولا انت مال امك هي راحت فين ولا جت منين هي حرة
ثانيا هو الدم والنخوة والاحساس انعدموا عند البُعدا اللي مش شايفين من بشاعة اللي حصل وفُجره غير ان البنت هي اللى غلطانة ؟ ده بدل ما يبقى قلبك مولع نار لان بنت حصل معاها ده ونفسك مثلا تولع فى اللى عمل فيها كده ؟؟؟ هي دي الرجولة ؟؟ اه نسيت معلش الكلمة دي انتوا ماتعرفوش عنها غير شكلها
التدوينة دي مش عن التحرش بس ان شاء الله هكتب تدوينة مخصوص عنه
التدوينة دي عن البنات الوحشيين اللى لسانهم طويل وبشتموا ع الفيس بوك او مدوناتهم :)
ايون زي انا مثلا كده او اللي بيقولوا الفاظ عيب اوفر اكتر من الشتيمة العادية
فى العادى لما بلاقي راجل ع الفيس هو اللي بيشتم بمسحه انما لو بنت عادي ... لاء مش عنصرية او عنصرية عادي براحتي
المهم انها ظاهرة زادت فى الفترة الاخيرة انا للوهلة الاولى بتصدم لما بشوف ألفاظ أبيحة من بنت وبعدين برجع استوعب مدى الكبت اللى احنا بنعيشه والقهر اللى بيحاول المجتمع يفرضه علينا والاقي مبررات كافية انها تخرجنا عن شعورنا
المجتمع بيتفنن في ممارسة كافة انواع القهر والعداوة والغباوة تجاة الأنثي بصفة عامة
يعني مثلا كل الدعاوي اللى بتنادي بالحد من حرية المرأة بكافة اشكالها سواء بالتزام البيت او عدم تشجيعها ع العمل او بالمبالغة في الحجاب بدعوة الخوف عليها اوقات واوقات تانيه الخوف ع الرجالة من الفتنة
هما غالبا بينادوا بده -اياً كان سببه ومبرره -لانهم مرضى ومشوهين نفسيا بيداروا امراضهم الذكورية بلسان الحكمة والنصح والدين
ولو خرجت يظهرلها بقي نفس النوع اللى فات بس من غير أقنعة الدين والحكمة دول بقى اللى بيقفوا يعاكسوا ويتحرشوا بيهم مش بيعرفوا يداروا عدائهم تجاه المرأة والنوعية دي ظهرت جدا الفترة الاخيرة ... الاكيد انها موجوده من زمان لكن يمكن النت ومواقع التواصل بدأت تفضح ده اكتر بس الاكيد ان مش كل بنت تم التحرش بيها بأى شكل هتكلم في ده
ده غير النماذج اللي بتعادي اي واحدة ناجحة لمجرد انها متفوقه عليه او مميزه عنه يالهووووووي دول بقى لا هما بينصحوا ولا بيتحرشوا دول بقى لسانهم طويل شويه بأسلوب او الفاظ تهين وتحرق الدم
ده غير طبعا الاسر والاهالي اللي طول الوقت بيفرقوا في المعاملة بين الولد والبنت والصلاحيات اللي الاولاد بيحصلوا عليها طول عمرهم مقابل ان البنات اكتر كلمه تتقالهم عيب انتي بنت
ماتعاليش صوتك انتي بنت
ماتشتميش عيب انتي بنت
عايزة تخرجي عيب انتي بنت ..ولو خرجتي طول الوقت تليفونات
وماتتأخريش عشان انتي بنت
ماتسافريش لوحدك انتي بنت
عيب يبقالك زمايل ولاد ف الجامعة عشان انتي بنت
وعيب ولد زميلك يتصل بيكي فى البيت عشان انتي بنت
كبت كبت كبت من كل الجهات
انا شايفة ان كل اللي فات اسباب منطقية للطفح اللغوي اللي وصلنا ليه
لما بنت تسمع خطبة رنانة من اللي مش شايفين منها غير انها عورة وسبب فساد وضياع الامة والكلام الكبير ده وماتطولش تشده من دقنه مثلا وتسحله ع الارض وتفقعله عنيه اللي مش شايفه منها غير كده حقها تشتم
ولما بنت واحد حيوان يتحرش بيها ف مواصلة عامه ولا في زحمة وماتقدرش انها تفضحه في الشارع وتجره من قفاه ع القسم عشان محدش هيقف معاه ويكلموها انها كده بتفضح نفسها كأنها راحت معاه شقة مفروشه مثلا حقها تشتم
ولما بنت اهلها يفضلوا اخواتها الاولاد عليها فى كل حاجة وتبتدي تكره انها بنت وتقرر تسترجل عشان تقلدهم او عشان تطمن اهلها انها مش مطمع وتقدر تروح وتيجي براحتها حقها تشتم
ولما نشوف الهم اللي احنا عايشينه كل يوم والاخبار السودا والشباب اللي دمه بيروح هدر والبنات اللى بتتهان وسفالة الداخلية واحنا في مكاننا ومافيش في ايدنا حاجة تتعمل يبقى بدل ما نتجنن او نطق حقنا نشتم
انا اول مره شتمت فيها ع الفيس لما شفت صورة خالد سعيد كان قلبي محروق بجد وبعد وقت هديت ورجعت يومين الثورة لما شفت صورة المتظاهريين وهما بيصلوا والامن بيرش عليهم ميه وبقالي كتير مش بشتم بس النهاردة لما شفت صورة محمد الجندي وقريت تفاصيل تعذيبه كان لازم اشتم
الاخوان كمان وعمايلهم الزرقة كائنات محفزة لطولة اللسان بصراحة
واخيرا انا عارفة ان الشتيمة مش حل بس يمكن تفريغ للغضب او الكبت او قلة الحيلة و مش لازم طبعا معنى اننا بنكتب شتيمه لما نقرا حاجة تستفز مشاعرنا ان ده العادي في حياتنا الطبيعية
===========
طبعا البوست ده ممكن يكون صدمة لسماح وسلوي :) بس انا عارفه انهم هيسمحوني ومش هيمسحوني من قايمة اصحابهم ع الفيس هما بس احتمال يخلوني ما اكتبش هنا تاني وساعتها بقى هروح على مدونتي اشتم فيها براحتي
