حيرة

وبعيدا عن افلام الخيال العلمي اللى بكلم فيها بقالي فترة وبعيدا عن احلام اليقظة اللى بنفوق منها على كوابيس الواقع نرجع شوية للواقع بس من غير كوابيس كفاية الكوابيس الليلية ونرجع للى المفروض انه يحصل رغم انى بكره كل ماهو مفروض وتقليدي
وبحبة منطق وبشوية عقل بس طبعا مش عقلي لان اساسا انا الحبة اللى كانو فاضلين عندى طاروا من زمان
هحاول افكر بشكل مختلف رغم يقيني اني مش هوصل للي يرضينى لكن وماله لعل وعسى ويمكن وجايز وميضرش برضه رغم انى عارفه اخر الحدوتة

من اول مبدأت اكتب هنا مع سلوى وإل جى وانا بفكر اتكلم عن جواز الصالونات ومن غير هجوم ولا انفعال ومعارضة حبيت اطرح الموضوع من خلال تساؤل هنوصله فى الاخر

لاقتنى بقولها فى حوار ساخن حائر ملوش مينا
هو احنا لما نحب حد نحبه عشان مفروض علينا نحبه ولا اصلا الحب هو اللى بيفرض نفسه علينا ؟
ردت وقالت بنحب الشخص لصفات جميلة فيه حنيته وطيبته حبه لينا
قولتلها ممكن منحبوش ولا نكره بس يكون عادي
قالتلى المهم الاستعداد للحب وللتغير والاستقرار من جوانا
قولتلها لازم يكون فى حب عشان يحصل التغير
قالتلى الحب بيجي بعد كده؟
طيب لو الحب مجاش بعد كده وفضل الاحساس انه عادي؟؟؟؟
سكتت شويه وقالت يبقى منكملش

وافتكرت حوار تانى كان بينى وبين واحده صاحبتي كنت بزورها لاقيتها جايبة ورقه وقلم وعامله حاجة اسمها تحليل سوت هو عبارة عن تحليل بيتعمل لما تكون قدام قرار ومحتار فيه بنكتب فيه نقاط القوة والضعف والفرص والمهددات كتبت هى طبعا المميزات اللى شافتها فى العريس اللى كان متقدم ليها والعيوب والظروف الخارجية اللى ممكن تهدد حياتهم او ممكن تكون فرصة ليهم وبتقارن وعمالة بتشرحلى وانا عندى زهووول مسكت الورقه وقولتها يابنتى اى حاجه تتحسب بالورقة والقلم الا الجوااااااااااااااااااز كونك توافقى او ترفضى ده راجع لانطباعك الشخصى و مشاعرك ناحيته مش ماسكه ورقه وقلم وبتحسبيها

طبعا هى لو كانت بتحبه عمرها ما كانت هتفكر كده لان اصلا هيكون فى استعداد انها تضحي وانها تتغاضى عن اى عيوب وتعرف كويس تتعايش معاها وهتكون على اتم استعداد انها تواجه اى تحديات معاه وده بيكون عيب فى جواز الصالونات ان اصلا بيكون الحد ده مش مهم قوي وبالتالي لما يحصل اى موقف حتى لو صغير مش بينفع نفوته لان اصلا مفيش دافع للاستمرار

حاسه انه بيكون فى فجوة بين الطرفين فى حالة انه جواز تقليدي لان محدش فيهم عرف التاني فى موقف وحياه قد ماعرفوا من كلام متزوق عشان الموقف اللى جمعهم
مش تعارف طبيعى وتلقائى يكون كل حد فيهم على راحته ومن غير ما المفروض انهم يحبوا بعض وان يكون ده شغلهم الشاغل وتكون المواقف مفتعلة لتحسين العلاقات او لانهم يقنعوا بعض انهم بيحبوا بعض

يعنى الصح ان الحب يتولد لوحده جوانا من غير منحس بيه يتسرسب فى روحنا فجأة نلاقى نفسنا حبينا
ولا نعيش نفسنا وهم الحب ونقنع نفسنا بيه واحنا اللى نخلقه بينا هيكون زى الطفل اليتيم اللى قررنا ان احنا نتبناه وبنحاول دايما انه ميحسش بغربة بينا وانه مننا ونيجى فى يوم غصب عننا نفتكر انه مش ابننا هنجرح نفسنا ونجرحه بس هيكون فات الوقت وكان م البداية الصح ان احنا نسيبه لحد ما يتولد لينا ابن من روحنا ساعتها لانه هيكون وليدنا مش هيهون علينا نجرحه فى يوم ولا نجرح نفسنا ؟؟؟

مش عارفة بجد بس عارفة انها بتختلف من شخصية للتانية ممكن ناس يناسبها جدا الزواج التقليدى وتنجح فيه وناس تانيه بيكون صعب عليها التكيف مع اى حد نفسيااات بقى نعمل ايه ههههههههه لالالالالا مش انا طبعا ده انا عاقلة جدا خالص اخر حاجة
------------------------------------------------------------------
هسافر تلات ايام كده اشوفكم لما ارجع ان شاء الله
ههههه باين كده والله اعلم انا خدت المدونة لحسابى ومن هنا ومن مكاني بنادى بعلو صوتي على سلوى وال جي المره جاية مستنية حد غيرى يكتب انتو لو سيبتونى كده الناس هتطفش م المدونة مانتو عارفين اللى فيها حد عاقل يكتب بقى كفاية جنان ع الناس

مرآتي

ونكمل سلسلة الخيال العملي اللى بدأنا فيها

كان فى موضوع شاغلني من فترة تقريبا كان من اخر عريس تفضلت وتكرمت وتعطفت وواقفت انى اقابله نيهاهاهاهاهاهاهاهاهاها وطبعا طفشته كالعادة

المهم كنت كل لما اقول لحد ان سبب الرفض رغم انه حد كويس انى حسيت ان ميولنا وتفكيرنا مش واحد وان فى اختلاف فى اهتماماتنا يبصلي بتعجب وكأني يعنى بقول كلام غريب مريب ويبقى على طرف لسانه يقولى انتى هبلة يابت؟ و اوقات بتتقال طبعا لان فى ناس مش بتخلى فى نفسها حاجة ودول قريب انا هقطع علاقتي بيهم فكل واحد يخلي باله من كلامه معايا بعد كده هههههههه

وكان فى ناس شايفه انه ايه المشكله ان تفكيرنا وميولنا مش واحده طالما حد كويس يعنى هو حد لاقي عرسان ؟ وبعدين ميول وايه وتفكير ايه اللى انا بقول عليه؟ ايه الكلام الفاضي اللى بقوله ده ؟ اهو عريس كويس وفى الاول والاخر المهم ان يكونلى بيت واسرة واطفال واعيش وخلاص مكل الناس عايشة والبنات بتجوز من غير ما تفكر فى الكلام الفاضى اللى انا بقوله ده

وناس تانيه كانت شايفه ان اصلا بعد الجواز مش بيكون فى وقت لموضوع الاهتمامات والهويات او ان حتى يكون فى فرصة انى اعمل حاجه انا بحبها لوحدي عشان اصلا يبقى فى وقت انى اعمل معاه حاجه مشتركه بينا بنحبها احنا الاتنين طالما اتجوزت خلاص بقى فكني من الحورات بتاعة البنات الفاضين اللى انا بفكر فيها

واراء اخرى كانت بتقول ان بالعكس التشابه فى الميول والاهتمامات بيولد الملل بين الزوجين وان لما يكون فى اختلاف بينهم ده ظاهرة صحية عشان التجديد على أساس ان كل حد يكون فى وادي مع نفسه ههههه حتي منعا للمشاكل والخلافات الناتجة عن الحوار المشترك واهو كله مصلحة وكده يبقى فله على الأخر

وانا بكلم مع سلوى من شويه قالتلى لازم يكون فى حد ادني من التفاهم والتشابه ولما قولتلها ان المفروض الزوجين بيكونو مرايات بعض وانهم انعكاس لبعض وانى شايفة ان التشابة لازم يكون حد اقصى مش حد ادنى عشان يقدروا يتحملوا انهم يقضوا سنين عمرهم سوا على الحلوه والمرة ردت رد منطقى وواقعي جدا مفيش حد تؤم حد

ولاني عايزه حد تفصيل ولان البوست ده خيال علمي زى ماحنا متفقين مقتنعتش لان مقتنعه بحاجة واحده ان التشابة والتؤام بين اى اتنين هيرتبطوا امر ضرورى جدا كلامهم تصرفاتهم اتجاهتهم هوايتهم تفكيرهم خصوصا لما يكون زواج تقليدي يعنى اصلا مفيش بينهم حب يدوب كل العوائق والصعوبات اللى ممكن تقابلهم واللى ممكن تكون ناتجة عن اختلافات فى التفكير