Saturday, December 15, 2007

الإنسان





كيفكم شباب ؟
عارفين؟
عندما فكرت في مدونه كلام بنات ... لم يكن الغرض الهجوم على الرجل
وبصراحه .. المرحله دي بالنسبه لي انتهت من زمان
أصلي كنت بنت متمرده حبتين او تلاته
حتى اني عملت جمعيه نسائيه وأنا في ابتدائي
ومنشورات بقى وحركات ... والراجل ده ملوش لازمه .. والراجل مستبد .. وحاجات من دي
المهم الحمد لله انها كانت في مرحله الطفوله والمراهقه .. بدل ما كان يجيلي مراهقه متأخرة
وأمشي في الشارع عامله رامبو مثلا ...هههههه
بس لما كبرت ... قلت ايه العبط ده
وبقى عندي قناعه ... ان ربنا مش بيفضل مخلوق على مخلوق .. غير بعمله
يعني كوني بنت هذا لا ينتقص مني أي شئ
وليس لأن هذا رجل .. يكن أفضل مني
أصبحت مقتنعه .. ان في حاجه اسمها انسان ... الانسان ده ممكن يكون رجل أو امرأه
تأملت حولي .. فوجدت اسرة الست فيها لا يستطيع زوجها أو أحد أبنائها أن يكح في وجهها
كلامها ماشي ع الجميع . صح أو غلط ما تفرقش
ووجدت أسرة .. الرجل فيها سي السيد على حق ... بيخافوا يقولوا له صباح الخير
سألت .. هو لازم حد يكون متسلط على التاني
قالوا .. أيوة .. المركب اللي فيها ريسين تغرق
طيب ليه ريسين ؟
المفروض ان الزوج والزوجه من نفس واحده .. يعني كيان واحد
يعني مش مهم مين يأخذ القرار ... المهم ان القرار يكون صح
مرة عندي ... مرة عنده ... وكده
بدون عند أو تعسف .. أو شعور بالقهر
أعتقد أن الانسان الواثق من نفسه .. معاملته لازم تكون كده
بس المشكله ان في موروثات كتير .. زرعت في رؤسنا .. أن الرجل أفضل
لكن الحقيقه ... ان المرأه ممكن تكون أفضل ... وممكن الرجل هو اللي يكون أفضل
بيحكم قانون الأفضليه ... عمل وتعامل كل واحد وما في قلبه من تقوى وايمان ... مش بيدخل في قانون

الأفضليه النوع
لكن بسبب الموروثات دي ... أصبحت بعض الرجال تتعامل بتسلط .. وبعض النساء تتعامل وبداخلها

شعور من النقص
تلك النقطه بالتحديد هي ما كان من أجلها عملنا المدونه
حتى نضع موروثات جديده
مثلا ... أرى أن المرأه قويه جدا من الداخل .. تلك القوى مغلفه بضعف
والرجل بداخله ضعف .. مغلف من الخارج بقوة
لذا يحب الرجل الضعف في المرأه ... وتنجذب المرأه للقوة في الرجل
سبحان الله ... كما الميزان
أريد أن أصل الى أن طبيعه المرأه ليس فيها انتقاص
وكذلك طبيعه الرجل
وهذا ما أريد طرحه مستقبلا ان شاء الله
أريد أن نحب أنفسنا كما هي .. ونرضى بها
وبدلا من أن نبحث عن جوانب السلبيه
نبحث عن الجوانب الايجابيه
وطبعا رأيكم يهمني جدا ... وأحب أعرفه
بسرعه على التعليقات ... منتظراكم
تحياتي

Monday, December 10, 2007

بنت قوية


يعني ايه بنت قوية ؟

يعني لو قالت كلمة حق بصوت عالي يعني لو ماخافتش الا من اللي خلقها يعني لو كانت جريئة وشجاعة وتدافع عن الغلبانين يعني لما تقف ضد الظلم

تبقى قوية ومفترية ؟

ليه الناس بتخلط بين الحق والباطل هل قوة الفتاة في الحق ينتقص من أنوثتها على الاطلاق هذا غباء مجتمعي لما بنت تقف تساند بنت تانية أضعف منها تبقى دي قوية ومفترية والتانية رقيقة

مين قال ان الصوت الواطي هو الرقة

مين قال ان الدلع المرق هو الرقة

الراجل

لأ المجتمع الغير واعي

الرقة انها تكون حنونة تكون حساسة تحس بالناس بالظلم تدافع بكل قوتها عن غيرها تتحمل فوق طاقتها

مرة في أتوبيس ست عجوز واقفة والمفروض الشاب التنح اللي قاعد في مقاعد المسنين يقوم ماقامش حزنت عليها قدرتها أمي ولو ان أمي لا تركب الأتوبيس أبداً ويومها حاجة غريبة كان الأتوبيس زحمة قوي لأن غيره عطل وحطوا كل الركاب مع بعض ترددت قليلاً لأنه زحمة لو فاضي بقوم علطول استنيت راجل يحس على دمه مفيش زعلت وقمت عشانها الست ايه ده ايه الأخلاق دي رفضت قالتلي انت بنت حيضايقوكي لو الاتوبيس فاضي كنت قعدت مكانك وأنا أأقولها محدش حيضايقني اقعدي يا أمي وهي تقولي لأ لحد ما راجل كان نازل قام وقالها اتفضلي يا حاجة الناس استغربت ليه بقوم وعيب خليني قاعدة والست الكبيرة مين يقوملها

لو الرجالة حاربت وغضبت وجابت حقنا كان يبقى ده حال البلد بالذمة

في كل مكان أطالب بحقي يقولوا مش رقيقة هي الرقة خضوع هي الرقة استكانة وضعف

أيوة قوية وحفضل قوية

بإسلامي قوية

بديني وأيماني قوية

بعلمي وأخلاقي قوية

أيوة قوية وحفضل بعون الله طول عمري قوية

يا بنتي يا أختي يا زميلة في العيشة ديه

خليك قوية

الرقة في القلب والاحساس بالناس

الجمال مش في الميوعة الجمال في حسن الخلق

القوية في الحق قوية في الحب والرومانسية قوية في الاحساس في كل حاجة

الحياء لا يتعارض مع كلمة الحق

خدي حقك ودافعي عن غيرك واقفي وقفة رجالة

أيوة يا راجل

ويلي منك وويلي عليك

رحم الله والدي وجدي رحم الله كل رجل كان له قوة القلب والعقل والايمان

أيوة

أيوة قوية

Sunday, December 9, 2007

بنت ذكية



كلام بنات ؟
يا تري البنات بتقول ايه ؟ بس يا جماعة من باب الأمانة عندي وجهة نظر
هي مين البنت ؟ في اعتقادي البنت من سن 10 : 20 بس في مصرنا المحروسة فيه
ارتباط وثيق بين كلمة بنت وعذراء ولكن مع التغيرات الاجتماعية لو قلنا بنت يعني عذراء
مش صحيح فيه عذارى تخطوا الستين دلوقتي يعني لو البنت مثلا 25 ولم تتزوج تبقى
بنت لأ هى امرأة شابة أو امرأة صغيرة السن لأن خبرتها بالحياة أصبحت أكبر وأتمت تعليمها وخرجت لمجال العمل
لذا وبناء على ما تم تقديمه معرفتش أكتب ايه لما العزيزة سلوى دعتني للكتابة عن كلام البنات بقالي مدة بعيدة شوية
عن مجتمع الجامعة وخلافه ولكن طرأ على فكري شئ طالما زهقني وزعلني من الرجالة والستات وكل الناس
عارفين ايه ؟؟
الجميع يفضلونها غبية
كان فيه فيلم لمارلين مونرو اسمه كده وتصوروا في رأيي عندها حق 100 % ليه ؟ أأقولكم تعالوا معايا نشوف في
المدرسة مكدبش المدرسين كانوا بيشجعوا ذكائي جداً وصدقتهم وقعدت أأقرأ وأكتب وأسأل وكنت دودة قراية وبعدين
بدأت أكبر
في البيت محدش عايزني أبقى ذكية واضح ان عشان انت الصغير مينفعش تفهم أكتر من الكبير بس في نفس الوقت
مش بتسكت وبتقول رأيك لدرجة اللي حواليك يقولوا ياريتك كنت غبي شوية

وكبرت حبة كمان ورحت الجامعة ياه زمايلنا الصبيان حد فهمهم غلط إن البنت مش زي الولد مع ان سعاد حسني
غنت لصلاح جاهين وقالت البنت زي الولد ماهيش كمالة عدد
بس لأ مينفعش في الرحلات زمايلنا الولاد قارفنا ومش فاهمين حاجة وطبعا البنت الأذكي دي الأفضل نحسبها ولد
زميلنا ماشي وماله حتى عشان محدش يضايقني

وبعدين رحت الشغل ياااه محكيلكوش بأه يا بنات ياساتر يا رب نار جهنم واتفتحت عليّ ازاي الموظفة البنت تفهم
عن المدير الراجل والأوحش تفهم عن المدير الست ليلتك مش فايته

الكل عايز البنت غبية عشان يعمل عليها ذكي هو وعشان موقع سلطته ميتهزش صحيح ازاي مدير أحمق حيمشي
موظف ذكي على عجين ميلخبطوش طبعا حيلخبطه
ونسيب الشغل بأه ونيجي للطامة الكبري جالك عريس يعني ايه دماغه مش عاليه حنجيبلك واحد تفصيل ؟ يعني ايه
ذكاؤه وأفقه محدود ؟ ده دلع بنات والبطران سكته قطران واسمعي وشيلي في قلبك ولا حد حاسس بيكي .

الحل ايه ما قولتلك يا بنتي الجميع يفضلونها غبية لكن اذا كنت ربنا امتحنك بالذكاء فاصبري وصابري وربنا ان
شاء الله يجعل لك من كل ضيق فرج

يعني الأصحاب مقدور عليهم الزملاء في الشغل متتكلميش معاهم ولا تصلحي أخطاءهم والشغل يبوظ مش مشكلة
صدقيني أحسن ميت مرة ما توجهي حد

المدير والمديرة سياسة لا أسمع لا أرى لا أتكلم

ماما وبابا وكبار العيلة سكتم بكتم لحد ما يطلبوا رأيك متتبرعيش بالرأي اوعي أحسن يقولوا انت يا بنت امبارح
حتعرفي أحسن من كبار العيلة

الجواز قدماك طريقين ما فيش غيرهم

تاخدي أي عريس ومتفكريش كتير وتعملي معاه زي بابا أو تستني فرج ربنا وتدعي ربنا يبعتلك واحد زيك مبتلى
بالذكاء شوفي تقدري على ايه واعمليه

على فكرة فيه ناس حتطلعك غلطانة مهما عملت أصل اسلوبك أصل طريقة أصل ألفاظك والله لو وقفت على
طراطيف صوابعك مش حيعجب صدقيني لازم اللي قدامك يكون عنده ثقة بنفسه وحتى لو في موضوع مش ذكي
مش مهم يعني انت مش ذكية في كل حاجة ولا انت عارفة كل حاجة بس هما عايزينك تحت طوعهم وخلاص مع ان
زمن الجواري راح وانقضى وكل شئ فيه خلاص مضى وعجبي


طبعا بطلي قراية

Wednesday, December 5, 2007

ممنوع دخول الرجال






إيه يا عم

إنت يا أستاذ

يا حضرة

على فين؟

المدونه اسمها

كــــلام البنــــات

يعني ممنوع دخول الرجال

خلونا نشم نفسنا بقى

أقولكم ... اتفضلوا

ماهو الرجل هو الأب والأخ والزوج

ونصف كلام البنات عليكم

المهم اللي يجي .. أديكم شايفين .. المدونه جديده وعليها كومبيالات ..

يعني يجيب معاه .. عداد زوار شيك

ساعه آخر صيحه .. وكده

ملحوظه هامه جدا جدا جدا

إل جي بتعلق صندوق على باب المدونه .. على إيدك اليمين وإنت داخل

الصندوق ده للرشاوي .. قصدي تبرعات ..

يعني كل واحد وهو داخل يحط في الصندوق اللي يقدر عليه

ماذا وإلا ... هنعمل بوستات جامده عن الرجاله

عموما أنتم أحرار بقى


نتكلم جد بقى

المدونه دي لكلام البنات

يا ترى البنات بتتكلم في إيه ؟

ده اللي إن شاء الله هنعرفه

في الموضوعات القادمه

طبعا المدونه مفتوحه للجنسين



الموضوعات سيقدمها بإذن الله معي

الأخت L.G

انتظرونا